Presidenti i Ukrainës, Volodymyr Zelensky, ka njoftuar se do të ndërmarrë një riorganizim të gjerë të qeverisë, duke propozuar edhe zëvendësimin e kryeministres Yulia Svirydenko.
Sipas mediave ndërkombëtare, ndryshimet synojnë rritjen e efikasitetit të qeverisë në një periudhë kur Ukraina vazhdon të përballet me sfidat e shkaktuara nga lufta me Rusinë.
Yulia Svirydenko mori detyrën e kryeministres pas riorganizimit të qeverisë në vitin 2025 dhe ka pasur një rol kyç në drejtimin e politikës ekonomike të vendit, si edhe në negociatat me partnerët ndërkombëtarë, përfshirë Shtetet e Bashkuara.
Në një deklaratë, Zelensky falënderoi Svirydenkon për kontributin e saj gjatë drejtimit të qeverisë.
“Jam mirënjohës ndaj Yulias për punën e saj të qartë, të qëndrueshme dhe efektive si kryeministre, si edhe për kontributin e saj shumëvjeçar në grupin e punës për zbatimin e politikës shtetërore të sanksioneve. I kam propozuar që të marrë drejtimin e një fushe të rëndësishme të marrëdhënieve me një partner strategjik të Ukrainës”, deklaroi presidenti ukrainas.
Ai shtoi se pret që, në bashkëpunim me deputetët, të miratohen ndryshimet përkatëse në përbërjen e qeverisë.
Sipas Zelenskyt, riorganizimi synon të përshpejtojë rritjen ekonomike, të forcojë industrinë e mbrojtjes dhe të rrisë efikasitetin e institucioneve shtetërore. Ndërkohë, pritet që në ditët në vijim të bëhen publike edhe ndryshimet e tjera në kabinetin qeveritar.
Propozimet e presidentit do të duhet të miratohen nga Parlamenti ukrainas përpara se të hyjnë në fuqi.
© Panorama.al
