PRISHTINE- Presidenti i Komisionit Evropian, Hoze Manuel Baroso, shprehu përkushtimin e BE-së për perspektivën evropiane të Kosovës.
Ai tha se vizita e tij në Kosovë është një sinjal për këtë përkushtim.
Megjithatë Baroso theksoi se “i takon Kosovës dhe popullit të saj të zbatojë reformat e nevojshme, përfshirë luftën kundër korrupsionit dhe krimit të organizuar”, lidhur me integrimin në BE.
Këto komente Baroso i bëri në Prishtinë, pas takimit me kryeministrin e Kosovës, Hashim Thaçi. Ai foli edhe për dialogun Prishtinë – Beograd, duke e cilësuar atë si një proces pozitiv.
Nga ana e tij kryeministri i Kosovës, Hashim Thaçi tha se Kosova do të jetë e përkushtuar për zbatimin e reformave të kërkuara nga BE-ja dhe shprehu bindjen se raporti i ardhshëm i progresit, i cili hartohet nga Komisioni Evropian, do të jetë më pozitiv se ai i vitit të kaluar.
Baroso, i shoqëruar edhe nga Komisioneri për Zgjerim i Bashkimit Evropian, Stefan Fyle, është takuar sot edhe me presidenten e Kosovës, Atifete Jahjaga, njoftoi Radio Evropa e Lirë
Një ditë më parë, delegacioni i lartë evropian ka qëndruar në Serbi, për të përcjellë mesazhin se çelësi i integrimeve në BE gjendet vetë në këtë shtet.
Barroso dhe Fule ndërkaq, kanë anuluar vizitën e paralajmëruar në Shqipëri, për shkak të siç është thënë tensioneve politike, të cialt po e përcjellin Tiranën që nga mbajtja e zgjedhjeve lokale, më 8 maj.
© Panorama.al
