Presidenti amerikan, Donald Trump, deklaroi se do të ishte një zhvillim shumë pozitiv nëse presidenti i Ukrainës, Volodymyr Zelensky, dhe presidenti i Rusisë, Vladimir Putin, do të zhvillonin një takim të drejtpërdrejtë.
“Jam i entuziazmuar që po flasin për një takim. Mendoj se jemi pranë diçkaje. Do të ishte e mrekullueshme nëse do të takoheshin“, tha Trump.
Ai theksoi se për arritjen e paqes nevojiten lëshime nga të dyja palët. “Duhet të bëjnë disa kompromise”, shtoi presidenti amerikan.
Më herët, Putin deklaroi se Trump është sinqerisht i vendosur për të gjetur një zgjidhje për krizën në Ukrainë.
“Trump thotë se nuk e priste që çështja e Ukrainës të ishte kaq e vështirë. Disa gjëra duken të thjeshta në sipërfaqe, por kur thellohesh, kupton se ka shumë faktorë të panjohur”, tha presidenti rus gjatë një takimi me përfaqësues të agjencive ndërkombëtare të lajmeve në kuadër të Forumit Ekonomik Ndërkombëtar të Shën Petersburgut.
Putin shtoi se propozimet e Trump për paqen mund të shërbejnë si bazë për një marrëveshje të mundshme mes Moskës dhe Kievit. Ai zbuloi gjithashtu se presidenti amerikan i ka kërkuar Rusisë të tregojë fleksibilitet në negociata, duke nënvizuar se Moska është e gatshme të bëjë kompromise nëse edhe Ukraina vepron në të njëjtën mënyrë.
Ndërkohë, Zelensky publikoi një letër të hapur drejtuar Putinit, ku i propozon një takim të drejtpërdrejtë për të rënë dakord mbi përfundimin e luftës, duke paralajmëruar se në të kundërt Ukraina është e gatshme të vazhdojë luftën.
Në letër, presidenti ukrainas shkruan se shumica dërrmuese e qytetarëve rusë janë lodhur nga sulmet me raketa dhe dronë, nga inflacioni dhe mungesat e karburantit, ndaj sipas tij janë të gatshëm për paqe.
“Nëse ju vetë nuk arrini në përfundimin se ka ardhur koha për t’i dhënë fund kësaj lufte, Ukraina do të vazhdojë të luftojë për ekzistencën e saj”, shkruan Zelensky, duke paralajmëruar se pozicioni politik i Putinit mund të vihet në rrezik.
“Historia ruse e ka treguar shumë herë: kur Rusia lodhet, vjen ndryshimi”, theksoi ai.
Zelensky propozon që lufta të marrë fund përmes një kontakti të drejtpërdrejtë mes tij dhe Putinit. “Propozoj që të caktojmë një datë konkrete për këtë takim”, shkruan ai, duke shtuar se Ukraina është e gatshme për një armëpushim të plotë gjatë negociatave, ku sipas tij duhet të marrin pjesë edhe Shtetet e Bashkuara dhe Evropa.
“Linja aktuale e frontit duhet të jetë pika nga ku fillon diplomacia”, vijon letra e presidentit ukrainas, i cili rrallëherë i drejtohet publikisht Putinit.
Ministria e Jashtme e Ukrainës bëri të ditur se letra do t’i dërgohet Kremlinit përmes kanaleve diplomatike.
Nga ana e tij, zëdhënësi i Kremlinit, Dmitry Peskov, deklaroi se Moska është në dijeni të letrës së Zelenskyt dhe se presidenti Putin do të informohet më vonë për përmbajtjen e saj. Ai shtoi se Zelensky mund të udhëtojë “në çdo kohë” në Moskë për t’u takuar me presidentin rus.
© Panorama.al
