Aktivistja dhe avokatja Dorina Lamaj, tha sot se protestuesit dhe organizatorët presionohen dhe intimidohen për shkak të revoltës masive qytetare ndaj sistemit të vjetër politik dhe qeverisjes së keqe.
E ftuar në programin e drekës në “News24”, ajo rrëfeu se në shesh dhe rrugë ka elementë nga forcat politike që përpiqen të intimidojnë protestuesit.
Avokatja tha se gjëja më e mirë e protestës është që të rinjtë e kanë vrarë frikën dhe janë një garanci që të shmangen përçarjet dhe presionet.
“Po përpiqen çdo ditë të përçajnë protestën dhe të marrin meritën. Por të rinjtë, motoja e të cilëve është politikë e re, mund ta bëjnë këtë vetëm duke çrrënjosur të vjetrën dhe duke vazhduar më tej”, tha ajo mes të tjerash.
Sipas avokates Lamaj, intimidimet vijnë nga të dy krahët e politikës, por duhet të kuptojnë se është një tjetër rini tani, që e ka vrarë frikën.
“Kam pasur intimidime nga të dyja krahët e politikës. Ka grupe brenda protestës, me sloganet e tyre bien direkt në sy të kujt krahu politik janë. Duhet të kuptojë që nuk është ajo rini si më parë, e kanë kuptuar shumë mirë klasën politike. Gjëja më e mirë është vrasja e frikës”, deklaroi aktivistja.
© Panorama.al
