E përditshmja shqiptare në Maqedoni, Koha, ka ngritur sot shqetësimin e mungesës së shkollave shqipe në kryeqytetin maqedonas, Shkup.
Gazeta raporton se “sipas përqindjes së shqiptarëve në qytetin e Shkupit, por edhe të numrit të nxënësve në shkolla të veçanta, shqiptarët duhet të udhëheqin të paktën edhe katër shkolla të mesme. Mirëpo, shqiptarët e kryeqytetit kanë mbetur ende në kohën e ish-Jugosllavisë, kur kishin vetëm një shkollë të mesme. Nga 26 shkolla të mesme, shqiptarëve u është lënë menaxhimi i tërësishëm vetëm i “Zef Lush Markut”, gjimnazit më të stërngarkuar në Shkup.
Përveç diskriminimit në vazhdimësi që i është bërë arsimit shqip në pjesën jug-lindore dhe qendrore të Maqedonisë, aty ku shqiptarët janë pakicë, shkruan më tej Koha, është edhe një diskriminim tjetër që u bëhet rreth 200 mijë shqiptarëve të kryeqytetit.
Konkretisht, prej 26 shkollave të mesme (komunale dhe shtetërore), të cilat funksionojnë në qytetin e Shkupit, vetëm një gjimnaz drejtohet nga shqiptarët.
Lidhur me këtë sipas gazetës ka reaguar edhe ambasadori shqiptar në Shkup, Arben Çejku.
“Për 200 mijë shqiptarët e Shkupit ka vetëm një shkollë të mesme në gjuhën shqipe, gjimnazi ‘Zef Lush Marku’”, u shpreh Çejku, teksa kërkoi nga zëvendësministri i Arsimit dhe Shkencës, Safet Neziri, të merren masa për përmirësimin e infrastrukturës së shkollimit në gjuhën shqipe.”
Sot, Çejku pritej të takohej me ministrin e ri të Arsimit, Pançe Kralev, të cilit pritet t’ia përcjellë shqetësimet e Tiranës zyrtare për diskriminimin arsimor që u bëhet shqiptarëve të Maqedonisë, e në këtë kontest, edhe të shqiptarëve të kryeqytetit.
© Panorama.al
