Shakira ishte një nga momentet më të komentuara të finales së Kupës së Botës 2026, me performancën e saj në pushimin e ndeshjes dhe një veshje të krijuar posaçërisht për këtë event.
Këngëtarja kolumbiane u ngjit në skenën e stadiumit New York New Jersey të dielën, më 19 korrik, me një kostum unik të shtëpisë së modës Roberto Cavalli, të dizenjuar nga drejtori artistik Fausto Puglisi.
Veshja e Shakirës ishte e mbuluar me më shumë se 200 mijë kristale Swarovski, ndërsa për përfundimin e saj u deshën rreth 120 orë punë dore dhe më shumë se dy javë për t’u realizuar.
Krijimi përfshinte një kostum trupi me kristale dhe një fund me thekë në nuanca të verdhës dhe rozës, i frymëzuar nga modeli “Ray of Sunset”, një referencë ndaj dizajnit ikonik “Ray of Gold” të Roberto Cavallit.
Në skenë, Shakirës iu bashkuan 34 valltarë, të cilët mbanin gjithashtu veshje të krijuara nga Roberto Cavalli, në të njëjtat tone të frymëzuara nga perëndimi i diellit.
Gjatë shfaqjes së pushimit të finales, Shakira performoi së bashku me Burna Boy këngën “Dai Dai”, kënga zyrtare e Kupës së Botës 2026.
Shfaqja e finales përfshiu gjithashtu performanca të artistëve të tjerë të njohur, mes tyre Madonna, BTS dhe Justin Bieber, në një produksion muzikor 11-minutësh të kuruar nga Chris Martin i Coldplay.
Programi muzikor u zhvillua gjatë finales mes Argjentinës dhe Spanjës, ku Spanja triumfoi me rezultatin 1-0 dhe siguroi titullin e saj të dytë kampion bote pas suksesit të vitit 2010.
