Kreu i Partisë Demokratike, Sali Berisha, ka akuzuar kryeministrin Edi Rama për mungesë serioziteti dhe përgjegjshmërie në lidhje me politikën e çmimeve të karburanteve në vend.
Sipas Berishës, Rama “ka mbetur në nivelin e batutave dhe mashtrimeve”, duke iu referuar premtimit të kryeministrit për të ndërhyrë në akcizën e naftës vetëm në rast se çmimi i saj tejkalon 220 lekë për litër.
Ai e cilësoi këtë qëndrim si “akt të papërgjegjshëm dhe cinik”, si dhe një shpërfillje ndaj qytetarëve shqiptarë.
“Rama ka ngelur ne nivelin e batutave e mashtrimeve dhe të premtimit të tij ultra cinik se do prek akcizën, kur nafta të tejkalojë 220 lekë për litër. Ky është një akt i papërgjegjshëm, është një akt cinik, është një shpërfillje e madhe për qytetarët shqiptarët”, tha kreu i PD.
Berisha bëri të ditur se Partia Demokratike ka përgatitur një paketë që synon uljen e barrës fiskale mbi karburantet
“PD ka gati paketën e programit të saj me të cilën ajo vendos mbi naftën të njëjtën ngarkesë fiskale që ka Maqedonia e Veriut dhe Kosova, ngarkesë e cila lejon këto dy vende që nuk nxjerrin asnjë litër naftë, të shesin naftën me çmim 60% më lirë se në Shqipëri. Kjo paketa do dorëzohet, ne e kemi paraqitur para shqiptarëve dhe garantoj se ajo do bëhet realitet me ardhjen në pushtet të kësaj partie”, u shpreh Sali Berisha.
© Panorama.al
