Për herë të katërt Edi Rama dhe ministrat e tij kanë shkuar në Presidencë për të bërë betimin dhe per te marrë zyrtarisht detyrën.
Kryeministri Edi Rama pasi bëri nënshkrimin, me dorën mbi kushtetutë u betua. Po ashtu, kreu i qeverisë do të ushtrojë edhe përgjegjësinë për ngritjen dhe funksionimin e ministrit virtual për Inteligjencën Artificiale Diella.
Më pas të gjithë ministrat me radhë bënë betimin mbi kushtetutë dhe morën dekretin nga presidenti Bajram Begaj.
Në fund kryeministri, ministrat dhe Presidenti realizuan edhe një foto familjare. Ndërsa institucioni i presidentit kishte organizuar edhe një koktej.
Ky akt formal vjen pas miratimit të ndryshimeve në përbërjen e Këshillit të Ministrave, gjatë një seance parlamentare të mbajtur ditën e djeshme, e cila u karakterizua nga tensione dhe përplasje me opozitën.
Pas dekretimit nga Presidenti i Republikës, ministrat e rinj nisin menjëherë ushtrimin e detyrës në postet e reja.
Ndryshimet në kabinet u propozuan nga Kryeministri Rama dhe u votuan në Kuvend mes polemikash politike dhe protestash verbale nga opozita parlamentare.
Kabineti i ri qeveritar:
Kryeministër
Edi Rama
Zëvendëskryeministër dhe Ministre e Infrastrukturës dhe Energjisë
Belinda Balluku
Ministër i Brendshëm
Albana Kociu
Ministër për Evropën dhe Punët e Jashtme
Elisa Spiropali
Ministër i Financave
Petrit Malaj
Ministër i Turizmit, Kulturës dhe Sportit
Blendi Gonxhja
Ministër i Mjedisit
Sofjan Jaupaj
Ministër i Arsimit
Mirela Kumbaro
Ministër i Shëndetësisë
Evis Sala
Ministër i Ekonomisë dhe Inovacionit
Delina Ibrahimaj
Ministër i Drejtësisë
Besfort Lamallari
Ministër i Mbrojtjes
Pirro Vengu
Ministër i Bujqësisë dhe Zhvillimit Rural
Andis Salla
Ministër i Shtetit për Pushtetin Vendor
Ervin Demo
Ministër Shteti dhe kryenegociator
Majlinda Dhuka
Ministre e Shtetit për Administratën Publike dhe Antikorrupsionin
Adea Pirdeni
Ministër i Shtetit për Marrëdhëniet me Parlamentin
Toni Gogu
Ministër Shteti për Inteligjencën Artificiale
Diella
