Aktivisti Erjon Murataj ka deklaruar se protestuesit nuk kanë ndërmend që të ulen në një tryezë për të negociuar me kryeministrin Rama.
I ftuar në News24, aktivisti përsëriti qëndrimin e palëkundur të dorëheqjes së kryeministrit Rama. Madje e këshilloi që dorëheqjen kreu i qeverisë t’ia bëjë dhuratë vetes për ditëlindje.
Po ashtu ai theksoi se protesta e nisur 35 ditë më parë do të ketë sukses për shkak të qytetarisë.
“Ne nuk kemi plan të ulemi në tryeze. Vendimi numër një i grupit të punës dje në pikat e përcaktuara në Kuvendin Kombëtar është nuk ka negociatë me Edi Ramën. Vetëm dorëheqje. Ke ditëlindjen, jep dorëheqjen dhe bëja dhuratë vetes këtë gjë. Deri në shtator do të shpëtojë Belinda, nuk të çon dot më tutje”, tha Murataj.
Teksa komentoi deklaratat e një dite më parë të kreut të SPAK, Klodian Braho, aktivisti tha: “Ky është moment historik. Dje Klodian Braho në historikun e drejtësisë shqiptare ka bërë histori, duke ua thënë në sy që deputeti nuk duhet të ketë imunitet”.
Murataj bëri thirrje që protesta të zhvillohet në mënyrë paqësore, duke kërkuar që edhe Policia e Shtetit të shmangë çdo provokim.
“Problemi është i thjeshtë, protesta do ketë sukses duke shpërfaqur qytetari dhe vlera evropiane. Policia e Shtetit nuk duhet të provokojë”, tha Murataj.
© Panorama.al
