Ndërmjetësit i kanë dorëzuar Iranit një propozim për të ulur tensionet në luftë me Shtetet e Bashkuara, i cili ofron një armëpushim 10-ditor për të gjetur mënyra për të ringjallur një marrëveshje të përkohshme të arritur muajin e kaluar, tha një zyrtar iranian për ‘Reuters’ të hënën.
Ndërkohë, Ministri i Brendshëm iranian, Esqandar Momeni, pritet të udhëtojë për në Pakistan të hënën, një vend që ndërmjetëson në luftën e Lindjes së Mesme, tha një burim i ministrisë së brendshme pakistaneze për AFP-në.
Burimi konfirmoi se ministri do të takohej me zyrtarë pakistanezë në kryeqytet, por nuk specifikoi nëse udhëtimi i tij ishte i lidhur me përpjekjet diplomatike të Islamabadit për t’i dhënë fund armiqësive midis Shteteve të Bashkuara dhe Iranit.
Zëdhënësi i Ministrisë së Jashtme iraniane tha më herët sot se përpjekjet diplomatike me Shtetet e Bashkuara përmes ndërmjetësve po vazhdonin, pavarësisht bombardimit të territorit iranian nga ushtria amerikane.
Nga ana e tij, Presidenti iranian Masoud Pezeshkian tha sot se Irani po përballet me një luftë “të plotë” me Shtetet e Bashkuara dhe paralajmëroi për pasojat për ekonominë e vendit.
“Realiteti është se sot, Republika Islamike e Iranit po përballet me një luftë të përgjithshme” nga Shtetet e Bashkuara, tha Pezeshkian, duke shtuar se iranianët duhet të “pranojnë pasojat natyrore të kësaj rezistence”, sipas deklaratave të publikuara nga faqja e internetit e presidencës.
© Panorama.al
