Rusia nuk ka marrë ende tekstin zyrtar të planit të zgjidhjes së konfliktit në Ukrainë, i cili u ndryshua pas konsultimeve të zhvilluara në Gjenevë mes BE-së, SHBA-së dhe Ukrainës të dielën, deklaroi Dmitry Peskov.
Zëdhënësi i presidencës ruse tha në një deklaratë për mediat se Moska nuk ka pranuar dokumentin zyrtar të planit të zgjidhjes që u hartua nga Shtetet e Bashkuara dhe Ukraina gjatë bisedimeve të fundit në Gjenevë.
Ai u shpreh se, në përgjigje të një pyetjeje nga agjencia TASS, “nuk kemi parë ende asnjë plan, kemi lexuar vetëm deklaratat që dolën nga diskutimet e zhvilluara në Gjenevë”, duke shtuar: “Nuk kemi marrë ende asgjë zyrtare”.
Peskov theksoi se Kremlini ka vënë re disa përshtatje në tekstin që ishte dërguar më herët në Moskë, por sqaroi se pala ruse nuk ka pranuar versionin përfundimtar të dokumentit për ta vlerësuar atë.
Të dielën, Uashingtoni dhe Kievi zhvilluan konsultime lidhur me “planin e paqes” amerikan me 28 pika. Sekretari i Shtetit i SHBA-së, Marco Rubio, e cilësoi takimin si “më produktivin” që nga fillimi i konfliktit.
Sipas mediave, SHBA dhe Ukraina kanë arritur marrëveshje për pjesën më të madhe të planit. Rubio theksoi se Shtetet e Bashkuara kanë rënë dakord të ndajnë kanalet negociuese që lidhen me rrugëtimin evropian të Ukrainës dhe me anëtarësimin e mundshëm të saj në NATO.
© Panorama.al
