Komisionerja e BE-së për Zgjerim, Marta Kos ka uruar kreun e Lëvizjes Vetëvendosje Albin Kurti për fitoren në zgjedhjet e së dielës, ku partia e tij doli forcë e parë duke marrë sërish besimin e publikut për të qeverisur.
Në një reagim në X, Kos iu bën thirrje partive politike që të bëjnë kompromis mes tyre për të ndërtuar stabilitet institucional, duke theksuar se është e vetmja mënyrë për të çuar vendin në rrugën drejt BE-së.
“Urime @albinkurti për fitoren e zgjedhjeve në Kosovë, dhe, më e rëndësishmja, për procesin e qetë, gjithëpërfshirës dhe të rregullt të votimit. Që Kosova të përparojë në rrugën e saj drejt BE-së, forcat politike tani duhet të bashkohen dhe të gjejnë kompromise për të ndërtuar stabilitet institucional.
Pres me padurim të kthehem në Kosovë sa më shpejt të jetë e mundur për të përshpejtuar punën për integrimin e Kosovës në BE dhe për të vazhduar punën për financimin e Planit të Rritjes”, ka shkruar Marta Kos.
© Panorama.al
