Ashtu siç është kthyer në traditë prej më shumë se një muaji, mijëra qytetarë kanë vijuar marshimin në rrugët e Tiranës pas protestës së zhvilluar për disa orë para Kryeministrisë, ku u kërkua si çdo ditë dorëheqja e kryeministrit Edi Rama dhe qeverisë së tij.
Pas përfundimit të tubimit, vargu i protestuesve është drejtuar drejt Komisariatit Nr. 3, ku prej paradites mbahen mbi 10 qytetarë të shoqëruar pas protestës së sotme para Kuvendit, e cila u shoqërua edhe me përplasje fizike me policinë.
Fillimisht, turma është zhvendosur drejt qendrës së Tiranës, më pas në zonën e njohur të “9-Katësheve”, për të vijuar më tej në drejtim të rrugës “Mine Peza”, ku ndodhet Komisariati Nr. 3, ku mbahen disa protestues.
Gjatë marshimit në rrugët e kryeqytetit janë dëgjuar thirrjet “Lironi çunat” dhe “Polici e krimit”, ndërsa qytetarët kanë vijuar lëvizjen në drejtim të komisariatit.
Protestuesit nuk kanë lënë pa artikuluar as kërkesën kryesore të protestës 33-ditore, dorëheqjen e kryeministrit, duke thirrur “Rama jep dorëheqjen” dhe “Shqipëria kërkon revolucion”. Po ashtu janë dëgjuar edhe thirrje të forta kundër klasës politike “Rama n’burg, Berisha n’burg”.
Protesta e sotme vjen pas tensioneve të raportuara më herët para Parlamentit, ku pati përplasje mes qytetarëve dhe forcave të rendit, si dhe përdorim të gazit lotsjellës dhe spraj piperi nga policia.
