Redaksionale- Në pesë protestat masive në Tiranë, një gjë ka qenë e qartë në rrugë e sheshe, në pankarta dhe në thirrjet e qytetarëve, zemërim ndaj qeverisjes dhe mënyrës se si po ushtrohet pushteti në vend nga kryeministri Edi Rama dhe njerëzit e tij.
Në këtë sens, protestat kanë pasur një bosht të qartë, kritikë ndaj qeverisë dhe kërkesë për ndryshim politik.
Në tubime janë parë edhe flamuj amerikanë të ngritur krah flamurit kombëtar shqiptar, një detaj ky që, përkundrazi, tregon një simbolikë pro-perëndimore dhe jo refuzim të aleancës strategjike të Shqipërisë dhe shqiptarëve me SHBA-në.
Zemërimi është i drejtuar ndaj kryeministrit Edi Rama dhe mënyrës së qeverisjes, duke reflektuar një pakënaqësi të akumuluar për keqqeverisje ndër vite, varfëri e mungesë llogaridhënieje.
Në këtë kuptim, sheshi ka folur për Shqipërinë dhe problemet e brendshme që në vend se të merrnin zgjidhje kohë më parë, përkeqësohen. Keqqeverisja dhe efektet e saj agravohen, paligjshmëria institucionale thellohet, ndërsa qytetarët humbin vende pune, kostot e jetesës shtrenjtohen dhe pamundësia për të bërë jetesë normale në vitin 2026 është e pamundur./News24
© Panorama.al
