Kryeministri i ri i Mbretërisë së Bashkuar, Andy Burnham, ka miratuar vazhdimin e përdorimit të bazave ushtarake britanike nga Shtetet e Bashkuara për sulme të caktuara ndaj Iranit, duke ruajtur politikën e ndjekur nga paraardhësi i tij, Keir Starmer.
Burnham mori zyrtarisht detyrën e kryeministrit më 20 korrik, pas dorëheqjes së Starmer dhe zgjedhjes së tij në krye të Partisë Laburiste.
Sipas i24news.tv, vendimi lidhet me përdorimin e bazës ushtarake Diego Garcia në Oqeanin Indian dhe bazës ajrore RAF Fairford në Angli për operacione që qeveria britanike i cilëson si “me karakter mbrojtës”.
Sipas raportimeve, kjo politikë ishte dakordësuar gjatë një mbledhjeje të ministrave të lartë dhe zyrtarëve të sigurisë përpara se Burnham të merrte detyrën.
Kryeministri i ri u informua për diskutimet dhe miratoi vazhdimin e vënies në dispozicion të bazave për forcat amerikane. Qeveria e mëparshme kishte lejuar SHBA-në t’i përdorte këto objekte për sulme të kufizuara ndaj kapaciteteve raketore iraniane, të cilat konsideroheshin kërcënim për anijet dhe aleatët në rajon.
Ky vendim nënkupton se bazat britanike pritet të mbështesin një pjesë të operacioneve të vazhdueshme ushtarake amerikane. Uashingtoni argumenton se sulmet synojnë neutralizimin e kërcënimeve raketore iraniane dhe mbrojtjen e lundrimit në Ngushticën e Hormuzit.
Vendimi i Burnham pritet të shkaktojë reagime në skenën politike britanike, pasi parti dhe figura të së majtës argumentojnë se përdorimi i bazave britanike mund ta bëjë Londrën bashkëpërgjegjëse në fushatën ushtarake.
Nga ana tjetër, qeveria përpiqet të ruajë ekuilibrin mes aleancës strategjike me Shtetet e Bashkuara dhe shqetësimeve ligjore e politike që lidhen me zgjerimin e konfliktit.
Bisedë telefonike me Trump
Pas marrjes së detyrës, Andy Burnham zhvilloi një bisedë telefonike me presidentin amerikan Donald Trump, gjatë së cilës ritheksoi angazhimin e Britanisë për garantimin e sigurisë detare në Ngushticën e Hormuzit.
Trump e cilësoi pozitiv komunikimin, duke bërë të ditur se dy liderët diskutuan për çështje të tregtisë, bashkëpunimit në mbrojtje dhe sigurisë rajonale.
Vendimi konsiderohet një nga sfidat e para të rëndësishme në politikën e jashtme për kryeministrin e ri britanik, i cili përballet me menaxhimin e përshkallëzimit të tensioneve në Lindjen e Mesme, ndërsa njëkohësisht duhet të përballet edhe me presionet politike në vend.
© Panorama.al
