Farat chia janë një superushqim që u shfaq disa vite më parë në botën perëndimore dhe shumë shpejt u bënë pjesë e përditshmërisë ushqimore të miliona njerëzve. Megjithatë, siç rezulton, ato nuk janë të përshtatshme për të gjithë.
Të pasura me fibra, acide yndyrore omega-3 dhe minerale, këto fara të vogla mund të shkaktojnë efekte anësore të papritura kur konsumohen në mënyrë të gabuar ose nga persona që kanë probleme të caktuara shëndetësore.
Ja çfarë duhet të dini, cilët persona duhet të jenë më të kujdesshëm dhe pse masa e konsumit është sekreti për të përfituar në mënyrë të sigurt nga vlerat e tyre ushqyese.
Pse farat chia nuk janë për të gjithë?
Edhe pse janë një burim i pasur lëndësh ushqyese, farat chia nuk janë të përshtatshme për çdo person. Ata që vuajnë nga probleme të zorrëve, tensioni i ulët i gjakut, alergjitë ndaj farave, sëmundjet e veshkave ose që marrin ilaçe holluese të gjakut duhet të tregojnë kujdes të veçantë.
Personat me probleme të zorrëve
Për ata që kanë probleme me tretjen, farat chia mund ta përkeqësojnë fillimisht gjendjen përpara se të sjellin përmirësim. Kur lagen në ujë, ato fryhen dhe thithin pothuajse 10 herë peshën e tyre në lëng. Tek personat me stomak të ndjeshëm, kjo mund të shkaktojë gazra, fryrje barku ose edhe ngërçe.
Specialistët rekomandojnë që konsumimi të nisë me gjysmë luge çaji për të parë se si reagon organizmi. Personat që vuajnë nga sindroma e zorrës së irrituar (IBS) ose ndjeshmëri të tjera të traktit tretës duhet t’i njomin gjithmonë mirë farat chia dhe të konsumojnë mjaftueshëm ujë për të shmangur shqetësimet.
Personat me tension të ulët të gjakut
Farat chia janë natyrshëm të pasura me acid alfa-linolenik dhe kalium, të cilat njihen për efektin e tyre në uljen e tensionit të gjakut. Edhe pse kjo është një përfitim për personat me hipertension, mund të jetë problematike për ata që kanë tashmë tension të ulët.
Konsumimi i tepërt mund të shkaktojë marramendje, ndjesi të fikëti ose lodhje të pazakontë.
Personat që marrin antikoagulantë ose aspirinë
Nëse një person përdor warfarinë, aspirinë ose ilaçe të tjera që hollojnë gjakun, farat chia mund të mos jenë zgjedhja më e mirë.
Ato janë të pasura me acide yndyrore omega-3, të cilat gjithashtu ndikojnë në hollimin e gjakut. Konsumimi i tepërt mund të rrisë rrezikun e gjakderdhjes ose të mavijosjeve.
Mjekët rekomandojnë që konsumimi të mos kalojë një lugë gjelle në ditë dhe këshillojnë konsultimin me mjekun nëse merrni medikamente të tilla.
Personat me alergji ndaj farave
Nëse një person ka alergji të njohur ndaj susamit, farave të lirit ose farave të sinapit, edhe farat chia mund të shkaktojnë reaksione të ngjashme.
Reaktiviteti i kryqëzuar është i rrallë, por i mundshëm. Shenjat e para paralajmëruese përfshijnë kruarje, skuqje të lëkurës, ënjtje ose vështirësi në frymëmarrje pas konsumimit.
Personat me alergji ndaj farave duhet t’i shmangin plotësisht farat chia ose të kryejnë një test alergjie përpara se t’i përfshijnë në dietën e tyre.
Personat me probleme të veshkave
Për personat që vuajnë nga sëmundje të veshkave, përmbajtja e lartë e kaliumit dhe fosforit në farat chia mund të jetë e dëmshme.
Këto minerale mund të grumbullohen në gjak kur veshkat nuk funksionojnë siç duhet, duke rritur rrezikun e komplikacioneve me kalimin e kohës.
© Panorama.al
