Koreja e Veriut ka lëshuar disa predha, mes tyre të paktën një raketë balistike me rreze të shkurtër, drejt zonës detare në perëndim të vendit. Kjo u bë e ditur nga ushtria e Koresë së Jugut.
Sipas autoriteteve koreano-jugore, lëshimet u kryen rreth orës 13:00 me orën lokale, nga një zonë pranë Çongxhusë, në provincën veriore Pjongan.
Ushtria e Koresë së Jugut deklaroi se raketa përshkoi një distancë prej rreth 80 kilometrash.
Kjo është lëshimi i parë i njohur i një rakete nga Koreja e Veriut që nga 19 prilli, kur Pheniani testoi raketa balistike me rreze të shkurtër dhe pretendoi se ato ishin të pajisura me municione thërrmuese.
Në fillim të prillit, Koreja e Veriut kishte njoftuar gjithashtu testimin e një koke të re raketore me municione thërrmuese dhe të një arme elektromagnetike.
Analistët vlerësojnë se këto veprime janë pjesë e përpjekjeve të Phenianit për të treguar aftësinë e tij për zhvillimin e një lufte moderne.
Ndërkohë, Ministria e Jashtme e Koresë së Jugut i bëri thirrje Phenianit të përgjigjet ndaj iniciativave për paqe dhe ulje të tensioneve në rajon.
Seuli theksoi se do të vazhdojë të ndjekë objektivin për çarmatimin bërthamor të plotë të gadishullit Korean, në bashkëpunim me komunitetin ndërkombëtar.
© Panorama.al
