Është konfirmuar vizita e presidentit të përkohshëm i Sirisë, Ahmed al-Sharaa javën e ardhshme Uashington D.C., ku do takohet me presidentin amerikan Donald Trump, duke kryer vizitën e parë zyrtare e një presidenti sirian në SHBA.
Një zyrtar i Shtëpisë së Bardhë konfirmoi për Fox News Digital se takimi është planifikuar për më 10 nëntor.
Trump dhe al-Sharaa janë takuar për herë të parë në maj, gjatë vizitës së presidentit amerikan në Arabinë Saudite.
“Djalë i ri, tërheqës, tip i fortë,” u shpreh Trump për gazetarët në bordin e Air Force One, pasi ishte takuar me al-Sharaa, i cili më parë ka qenë udhëheqës i Al-Kaedës. “Ka një të kaluar të fortë, luftëtar i vërtetë. Ka një shans real për ta mbajtur vendin të qëndrueshëm.”
Al-Sharaa, i njohur më parë me emrin e luftës Abu Mohammad al-Jolani, udhëhoqi ofensivën rebele në dhjetor që çoi në rrëzimin e regjimit të ish-diktatorit sirian Bashar al-Assad.
Grupi i tij, Hay’at Tahrir al-Sham, ishte shpallur nga Departamenti i Shtetit i SHBA-së si një Organizatë e Huaj Terroriste (FTO). Sekretari i Shtetit, Marco Rubio, njoftoi në qershor se administrata Trump do ta hiqte këtë përcaktim si pjesë e përpjekjeve të presidentit për të rivendosur marrëdhëniet SHBA–Siri.
“Heqja e këtij përcaktimi si FTO është një hap i rëndësishëm në përmbushjen e vizionit të Presidentit Trump për një Siri të qëndrueshme, të bashkuar dhe paqësore,” tha Rubio në një deklaratë.
Trump u prit me ovacione në Riad pasi njoftoi se administrata e tij do të ndalonte sanksionet ndaj Sirisë për t’i “dhënë një shans madhështisë”.
“Ah, çfarë s’bëj unë për princin e kurorës,” tha me shaka Trump, duke iu referuar udhëheqësit de facto të Arabisë Saudite, Mohammed bin Salman, i cili e kishte nxitur atë të takohej me liderin e ri sirian.
© Panorama.al
