Koalicioni “Aleanca për qytetarin” vazhdon të figurojë me më shumë vota se koalicioni i PS-së.Rezultatet zyrtare të KQZ-së tregojnë se epërsia në vota i koalicionit të maxhorancës aktuale shkon në rreth 99 348 më shumë se koalicioni opozitar. Edhe pse në këtë diferencë, Partia Socialiste vazhdon të ketë epërsi ndaj Partisë Demokratike. Partia Socialiste ka grumbulluar 425 678 vota në të gjithë vendin, ndërsa Partia Demokratike 326 290 vota, me një diferencë prej 99 380 votash. Por ajo që i jep avantazh koalicioni “Aleanca për qytetarin”, që drejtohet nga Partia Demokratike, janë partitë aleate që kanë grumbulluar nga ana e tyre me mijëra vota. Lëvizja Socialiste për Integrim është partia që ka kaluar kufirin e mbi 70 mijë votave që grumbulloi në zgjedhjet e përgjithshme të 2009-s, duke grumbulluar 116 023 vota, duke u ndjekur nga Partia Republikane e Fatmir Mediut, me 72 946 e pas tij Partia Drejtësi Integrim dhe Unitet e Shpëtim Idrizit, me 62 999 vota. Por, dhe partitë e tjera përbërëse të koalicionit “Aleanca për qytetarin”, si Aleanca Demokratike, Lëvizja e Legalitetit, Partia Agrare Ambientaliste, apo dhe Partia e Ballit Kombëtar, kanë disa dhjetëra mijëra vota, duke krijuar në këtë mënyrë diferencën me koalicionin e majtë opozitar. Ajo që bie në sy te koalicioni “Aleanca për të ardhmen”, të drejtuar nga Partia Socialiste, është pesha e madhe që kjo parti mban në këtë koalicion. Përveç partive tradicionale të këtij koalicioni, ka dhe parti që nuk kanë mundur të grumbullojnë nga elektorati i tyre as një mijë vota në të gjithë vendin. Madje, Partia Demokrate për Integrim e Prosperitet ka marrë vetëm 69 vota, apo Partia për Mbrojtjen e të Drejtave të Punëtorëve, që ka marrë 384 vota. Në listën e partive aleate të këtij koalicioni, numrin më të madh të votave e ka marrë Partia Demokracia Sociale e Paskal Milos, e cila ka marrë në shkallë vendi 53 069 vota, e që pasohet nga Partia Demokristiane, me 47 645 vota dhe Partia Socialdemokrate e Skënder Gjinushit, me 43 801 vota. Vota e 8 majit duket se ka qenë e balancuar ndaj dy kampeve, ku qytetarët, me votën e tyre u kanë dhënë bashkitë e mëdha të majtëve, ndërsa bashkitë e vogla dhe shumicën e komunave të vendit e kanë fituar të djathtët. Ky fakt dhe shumica e votave që ka marrë e djathta si koalicion tregojnë se në zgjedhjet e 8 majit mungoi vota plebishitare, që pretendohej nga Partia Socialiste. Kreu socialist, Edi Rama, gjatë fushatës zgjedhore kërkoi votë kundër qeverisë, duke e akuzuar atë si të korruptuar dhe autore të ngjarjeve të 21 janarit në bulevard, ku humbën jetën katër qytetarë. Mbeten edhe dy kuti për Këshillin Bashkiak të Tiranës, në Njësinë Nr. 5, që të numërohen për të pasur shifrën e saktë të numrit të votave në rang kombëtar të partive dhe koalicioneve.
Koalicionet Zgjedhore
ALEANCA PER QYTETARIN
1. Aleanca Demokratike 32.569
2. Aleanca Europiane Ekologjike 5225
3. Bashkimi Liberal Demokrat 26.662
4. Lëvizja Socialiste për Integrim 116.023
5. Lidhja Demokristiane Shqiptare 20.028
6. Partia Agrare Ambientaliste 30375
7. Partia Aleanca Demokristiane 6118
8. Partia Aleanca e Maqedonasve për Integrimin Europian 2504
9. Partia Aleanca për Demokraci dhe Solidaritet 2960
10. Partia Aleanca Popullore 3020
11. Partia Balli Kombëtar 20646
12. Partia Balli Kombëtar Demokrat 15513
13. Partia Bashkimi Demokrat Shqiptar 6687
14. Partia Demokracia e Re Europiane 4874
15. Partia Demokratike 326.290
16. Partia Drejtësi Integrim dhe Unitet 62.999
17. Partia e të Drejtave të Mohuara e Re 3819
18. Partia Konservatore 2808
19. Partia Lëvizja e Legalitetit 36.959
20. Partia Ora e Shqipërisë 3257
21. Partia Personat me Aftësi të Kufizuar 891
22. Partia Republikane Shqiptare 72.946
ALEANCA PER TE ARDHMEN
1. Partia Aleanca Arbnore Kombëtare 9093
2. Partia Ardhmëria Shqiptare 2503
3. Partia Bashkimi Popullor i Pensionistëve Shqiptar 497
4. Partia Bashkimi Republikan Shqiptar 4190
5. Partia Demokracia Sociale 53.069
6. Partia Demokrate për Integrim e Prosperitet 69
7. Partia Demokratike e Bashkimit Mysliman të Shqipërisë 1616
8. Partia Demokristiane e Shqipërisë 47.645
9. Partia e Gjelbër 8403
10. Partia e Pajtimit Kombëtar 824
11. Partia e Punës e Riorganizuar 4107
12. Partia e Unitetit Kombëtar 4420
13. Partia G99 15.104
14. Partia Ligj dhe Drejtësi 7807
15. Partia për Mbrojtjen e të Drejtave të Emigrantëve 908
16. Partia për Mbrojtjen e të Drejtave të Punëtorëve 384
17. Partia Reformatore Demokratike 1629
18. Partia Rruga e Lirisë 1426
19. Partia Socialdemokrate 43.801
20. Partia Socialiste e Moderuar 6164
21. Partia Socialiste e Shqipërisë 425.678
22. Partia Socialiste e Vërtetë ‘91 23.307
23. Partia Toleranca e Re e Shqipërisë 695
24. Partia Bashkimi për të Drejtat e Njeriut 40.486
Partitë jashtë koalicioneve
1. Lëvizja për Zhvillim Kombëtar 20.933
2. Lëvizja për Drejtësi Shqiptare 540
3. Partia e Çështjeve shqiptare 366
4. Partia Komuniste e Shqipërisë 6173
5. Partia Kristian Demokrate e Shqipërisë 495
6. Partia Lëvizja Punëtore e Shqipërisë 98
7. Partia Mendimi i Djathtë Liberal 1160
8. Partia e Minoritetit Etnik Grek për të Ardhmen 4996
ARISTIR LUMEZI
© Panorama.al
