Koalicioni i djathtë “Aleanca për qytetarin”, vazhdon të thellojë avantazhin ndaj koalicionit opozitar. Mbrëmë, Komisioni Qendror i Zgjedhjeve bëri publike votat e marra nga partitë përbërëse të koalicioneve për këshillat bashkiakë.Nga shumatorja e votave, koalicioni i drejtuar nga Partia Demokratike, “Aleanca për qytetarin”, ka marrë 726 471 vota, kundrejt koalicionit të drejtuar nga Partia Socialiste, “Aleanca për qytetarin”, i cili ka marrë 641 215 vota. Diferenca mes dy koalicioneve vazhdon të rritet nga një ditë më parë, duke e çuar atë në 85 mijë vota më shumë për koalicionin e djathtë.
Një ditë më parë, diferenca mes tyre ishte 46 mijë vota në favor të koalicionit të djathtë. Partitë politike pjesëmarrëse jashtë dy koalicioneve të mëdha, gjithsej tetë parti, ndër të tjera dhe Lëvizja për Zhvillim Kombëtar, kanë marrë 32 mijë vota për këshillat e bashkive dhe komunave në shkallë vendi. Por, bien në sy votat që dy partitë e mëdha kanë marrë në shkallë vendi. Partia Socialiste ka marrë më shumë vota se Partia Demokratike. Socialistët kanë marrë 389 690 vota, ndërsa demokratët 297 706, me një diferencë prej 92 mijë votash. Por ajo që ndikon në numrin më të madh të mbështetësve të koalicionit të djathtë duket se është identiteti i partive përbërëse të tij, krahasuar me partitë e koalicionit të majtë. Edhe pse Partia Socialiste ka grumbulluar në koalicionin e saj 24 parti nga 22 që ka koalicioni i djathtë, kjo nuk e ka ndihmuar atë të ketë epërsi në votën popullore ndaj së djathtës. Edhe pse u mundua të krijojë një koalicion të gjerë, Partia socialiste nuk ka arritur të marrë votë plebishitare ndaj koalicionit qeverisës, edhe pse e gjithë fushata u konceptua si një fushatë politike kundër qeverisë, dhe jo si alternativë në qeverisjen vendore. Ajo që bie në sy në votat e marra nga partitë e dy koalicioneve janë numri i madh i votave të marra nga LSI, apo PDIU, të cilat kanë marrë më shumë vota se partitë më të vjetra të politikës shqiptare. Lëvizja Socialiste për Integrim ka marrë në shkallë kombëtare 104 367 vota, e ndjekur nga Partia Republikane Shqiptare, me 65 562, e më pas nga Partia Drejtësi, Integrim dhe Unitet, 58 127 vota. Edhe Partia Lëvizja e Legalitetit ka siguruar një numër jo të vogël votash, 32 780. Ndërsa në koalicionin e majtë, të kryesuar nga Partia Socialiste, partitë tradicionale të këtij koalicioni kanë mundur të marrin një numër jo të vogël votash, por më pak se ato të koalicionit të djathtë. Partia Demokracia Sociale ka marrë 47 884 vota, Partia Demokristiane ka marrë 42 763 vota, Partia Socialdemokrate 39 379 vota, Partia Bashkimi për të Drejtat e Njeriut 37 887 dhe Partia Socialiste e Vërtetë 91 ka marrë 20 883 vota.
726 471 vota
Ka marrë koalicioni i drejtuar nga Partia Demokratike, “Aleanca për qytetarin”, duke e thelluar diferencën me koalicionin opozitar me 85 mijë vota
641 215 vota
Ka marrë koalicioni i drejtuar nga Partia Socialiste, “Aleanca për të ardhmen”. Ky koalicion, i cili përbëhet nga 24 parti politike të spektrave të ndryshëm, nuk ka arritur të grumbullojë votën popullore
Koalicionet Zgjedhore
ALEANCA PER QYTETARIN
1. Aleanca Demokratike 28847
2. Aleanca Europiane Ekologjike 4445
3. Bashkimi Liberal Demokrat 23786
4. Lëvizja Socialiste për Integrim 104367
5. Lidhja Demokristiane Shqiptare 17850
6. Partia Agrare Ambientaliste 26712
7. Partia Aleanca Demokristiane 5538
8. Partia Aleanca e Maqedonasve për Integrimin Europian 2504
9. Partia Aleanca për Demokraci dhe Solidaritet 2662
10. Partia Aleanca Popullore 2414
11. Partia Balli Kombëtar 18513
12. Partia Balli Kombëtar Demokrat 14305
13. Partia Bashkimi Demokrat Shqiptar 5943
14. Partia Demokracia e Re Europiane 4753
15. Partia Demokratike 297.706
16. Partia Drejtësi Integrim dhe Unitet 58.127
17. Partia e të Drejtave të Mohuara e Re 3186
18. Partia Konservatore 2797
19. Partia Lëvizja e Legalitetit 32780
20. Partia Ora e Shqipërisë 2771
21. Partia Personat me Aftësi të Kufizuar 868
22. Partia Republikane Shqiptare 65.562
ALEANCA PER TE ARDHMEN
1. Partia Aleanca Arbnore Kombëtare 8327
2. Partia Ardhmëria Shqiptare 2333
3. Partia Bashkimi Popullor i Pensionistëve Shqiptar 437
4. Partia Bashkimi Republikan Shqiptar 3946
5. Partia Demokracia Sociale 47884
6. Partia Demokrate për Integrim e Prosperitet 69
7. Partia Demokratike e Bashkimit Mysliman të Shqipërisë 1545
8. Partia Demokristiane e Shqipërisë 42763
9. Partia e Gjelbër 7490
10. Partia e Pajtimit Kombëtar 785
11. Partia e Punës e Riorganizuar 3497
12. Partia e Unitetit Kombëtar 3891
13. Partia G99 13702
14. Partia Ligj dhe Drejtësi 6570
15. Partia për Mbrojtjen e të Drejtave të Emigrantëve 846
16. Partia për Mbrojtjen e të Drejtave të Punëtorëve 382
17. Partia Reformatore Demokratike 1344
18. Partia Rruga e Lirisë 1426
19. Partia Socialdemokrate 39.379
20. Partia Socialiste e Moderuar 5459
21. Partia Socialiste e Shqipërisë 389.690
22. Partia Socialiste e Vërtetë 91 20883
23. Partia Toleranca e Re e Shqipërisë 680
24. Partia Bashkimi për të Drejtat e Njeriut 37.887
ARISTIR LUMEZI
© Panorama.al
