Ushtarët e KFOR-it nga mbrëmja e sotme kanë filluar të largojnë zhavorrin të cilin serbët e Veriut të Mitrovicës e kishin përdorur për të bllokuar rrugën kryesore që çon në pikëkalimin kufitar të Jarinjës.
Ndërkaq serbët, si kundër-reagim, kanë nisur të sjellin sasi tjera të zhavorrit për të vendosur sërish në rrugë.
Siç raporton agjencia serbe e lajmeve “Beta”, në pikëkalimin kufitar në Jarinjë, gjendja është e tensionuar, mirëpo nuk ka përleshje.
Ushtarët e KFOR-it gjithashtu kanë hequr flamurin serb i cili po qëndronte në barrikadën e vjetër.
Ata kanë larguar për rreth 100 metra pengesën e vendosur me tela me gjemba në drejtim të Leposaviçit, dhe kanë vendosur tanke dhe mjete të blinduara përgjatë rrugës që çon në bazën e KFOR-it.
Ndryshe, siç raportojnë mediet serbe, ushtarët e KFOR-it janë të pajisur me mjete për pengimin e trazirave.
Forcat e KFOR-it gjithashtu kanë vendosur një pikëkontrolli në bazën e tyre “Nothing Hill” tek Leposaviçi, ku po kontrollojnë të gjithë qytetarët që kalojnë andej, dhe po lejojnë kalimin e makinave vetëm një e nga një.(Express)
© Panorama.al
