Aktivisti i njohur amerikan për të drejtat civile, Jesse Jackson, ka ndërruar jetë, njoftoi familja e tij përmes një deklarate.
Në rrjetet sociale, familja e tij shkruan se Jackson vdiq paqësisht këtë mëngjes, në moshën 84-vjeçare.
“Babai ynë ishte një udhëheqës shërbëtor, jo vetëm për familjen tonë, por edhe për të shtypurit, të padëgjuarit dhe të injoruarit në mbarë botën”, tha familja në një deklaratë.
“Angazhimi i tij i palëkundur ndaj drejtësisë, barazisë dhe të drejtave të njeriut ndihmoi në tronditjen e një lëvizjeje globale për liri dhe dinjitet”, thuhej në deklaratë.
Jackson luftoi për të drejtat civile përkrah Martin Luther King Jr në vitet 1960 dhe ishte dy herë kandidat për president i Partisë Demokratike në vitet 1984 dhe 1988.
Shkaku i vdekjes së Jesse Jackson nuk është bërë i ditur, ndërsa familja e tij theksoi se ai vdiq paqësisht, i rrethuar nga të dashurit.
Në vitin 2017, Jackson zbuloi se vuante nga sëmundja e Parkinsonit. Ai ishte trajtuar për të paktën dy vjet para se të ndante publikisht diagnozën, raporton partneri ynë amerikan NBC News.
Shërbimi Kombëtar Shëndetësor (NHS) thotë se, edhe pse Parkinsoni nuk shkakton drejtpërdrejt vdekjen, ai mund të shkaktojë stres të madh mbi trupin e një personi.
