Gjashtë muaj pas luftës 12-ditore me Iranin për programin e tij bërthamor, zyrtarët izraelitë po ngrenë mundësinë e një konflikti të ri për shkak të përpjekjeve të Teheranit për të rindërtuar arsenalin e tij të raketave balistike, siç është vënë në dukje nga Wall Street Journal.
Kryeministri izraelit Benjamin Netanyahu, duke folur në një ceremoni diplomimi për pilotët e forcave ajrore izraelite të mërkurën, tha se Izraeli po monitoron riarmatimimin e Hamasit, Hezbollahut dhe Iranit dhe do të ndërmarrë veprime nëse është e nevojshme.
Po ashtu, ministri i mbrojtjes i vendit dhe shefi i forcave ajrore, duke folur në të njëjtin aktivitet, thanë se Izraeli do të ndërmarrë veprime për të penguar kërcënimet e reja.
“Ne nuk kërkojmë konflikt, por i kemi sytë hapur për çdo rrezik të mundshëm”, tha Netanyahu.
Komentet erdhën ndërsa Netanyahu përgatitet të udhëtojë drejt Shteteve të Bashkuara për një takim me Presidentin e SHBA-së Donald Trump më vonë këtë vit. Vlerësimi i Izraelit për përparimin e Iranit në fushën e raketave balistike dhe perspektiva e veprimeve të mëtejshme ushtarake do të jenë në axhendën e takimit të dy udhëheqësve, sipas një zyrtari izraelit.
Është e paqartë se si do të reagojë administrata Trump ndaj perspektivës së sulmeve të reja ndaj Iranit, pasi shpreson që Izraeli të konsolidojë marrëveshjen e paqes në Gaza dhe të zgjidhë tensionet me qeverinë e re në Siri.
Trump ka thënë vazhdimisht se bombardimet amerikane të vendeve kryesore iraniane gjatë verës eliminuan programin bërthamor të Iranit dhe hapën rrugën për paqe në rajon. Trump e ka paralajmëruar Iranin të mos rindërtojë objektet e tij bërthamore, por nuk ka përmendur konkretisht raketat balistike.
“Siç ka deklaruar Presidenti Trump, nëse Irani kërkon të sigurojë armë bërthamore, ajo strukturë do të sulmohet”, tha zëdhënësja e Shtëpisë së Bardhë, Anna Kelly, kur u pyet nëse administrata do të mbështeste një sulm izraelit ndaj programit të raketave.
Çdo sulm izraelit do të kishte nevojë të paktën për miratimin e heshtur të Uashingtonit, pasi Izraeli do të kishte nevojë për ndihmën amerikane për t’u mbrojtur nga raketat që Irani ka të ngjarë të lëshonte në shenjë hakmarrjeje.
© Panorama.al
