Inter fiton derbin, lumturohet Juventusi

Bardhezinjtë barazojnë me Kaljarin, humbet Udineze në Xhenova

Zikaltërve u mjaftoi një gol i Militos, Milani shpërdoron

Interi fiton derbin ndaj Milanit, duke i bërë më shumë një nder Juventusit, i cili kishte barazuar pasditen e djeshme në fushën e vet me Kaljarin. Humbasin edhe Udinese e Fiorentina. Zikaltërve u mjaftoi një gol i Militos për të mundur një Milan që prodhoi shumë lojë, por po aq shumë edhe shpërdoroi. Kështu, kuqezinjtë mbesin një pikë pas Juventusit, ndërsa Interi mban vendin e 5-të me 32 pikë. Sakaq, Juventusi vazhdon të mos humbasë, por barazimi i djeshëm në shtëpi ndaj Kaljarit 1-1 ishte një gjysmë hapi fals. Mirko Vuçiniç kaloi bardhezinjtë në avantazh, por Kosu i është përgjigjur me një gjuajtje të fortë nga jashtë zone, në fillim të takimit, duke vendosur balancat në këtë sfidë. Trajneri Antonio Konte priste tri pikë, por djemtë e tij i kanë dhënë vetëm një. Në fushë u pa një skuadër pak brilante kundër sardëve. Juves nuk i hyri në punë as goli i shënuar që në fillim të takimit, ndërsa ka marrë barazimin e tetë radhazi që nga nisja e sezonit. Duket se ngjyrat kuqeblu janë një mallkim për “Zonjën”, e cila ka barazuar me Bolonjën, Xhenoan dhe tani, Kaljarin në shtëpi. Por Juvja ka thyer rekordin e 62 viteve më parë. Pavarësisht kësaj, vështirë se ka njeri që feston te “Zonja e Vjetër”. Nga ana tjetër, Kaljari me Atorin në qendër të mbrojtjes ka gjetur sigurinë që jo gjithmonë e ka pasur. Ndërkohë që në sulm, për t’i vendosur gjërat në vendin e vet, mendoi një kundërsulm i shpejtë, i finalizuar nga njeriu me më shumë cilësi në dispozicion të teknikut Davide Balardini, Kosu. Pas dy humbjesh radhazi dhe 9 golave të pësuar, Xhenoa ka parë dritë në fund të tunelit. Kuqeblutë e drejtuar nga Paskuale Marino (ish-trajneri i Udinezes) kanë fituar jo me pak vështirësi me rezultatin 3-2, në një sfidë të mbushur me emocione. Edhe pse pa titullarët afrikanë (në vendlindje për Kupën e Afrikës), friulanët kanë konfirmuar se janë një skuadër e frikshme dhe një realitet i bukur i futbollit italian, pasi interpretojnë një pjesë të parë fantastike. Fitore të rëndësishme shënoi dje edhe Lacio. Me nga një gol në çdo pjesë loje, skuadra e Edi Rejës kalon pa shumë vështirësi Atalantën me rezultatin 2-0. Bergamaskët regjistrojnë për herë të parë në këtë sezon dy humbje radhazi (e para, javën e kaluar kundër Milanit) dhe ndeshja e djeshme duket një fotokopje e asaj të kaluarës. Vetëm 20 minuta lojë dhe penallti për Lacion. Masielo shtrin në zonë Radun dhe nga pika e bardhë nuk gabon Hernanesi. Në 45 minutat e dyta janë sërish vendësit që kërkojnë dyfishimin, por pasi kapiteni Roki humb dy raste, fitoren e blindon Klose në sekondat e para të kohës shtesë, kur me një të majtë me rrotullim mund portierin Konsilji dhe të gjithë në festë. Në ndeshjet e tjera, Çesena mundi Novarën 3-1 falë dopietës së Adrian Mutusë, ndërsa Kievos i mjaftoi një gol për të munduar Palermon. Fitore mjaft të rëndësishme sigloi Leçe në fushën e vështirë të Fiorentinës, ndërsa Parma shkatërroi 3-1 Sienën. Sot luhet sfida e fundit mes Napolit dhe Bolonjës.

Skeda
Milan-Inter    0-1
Shënues: Milito 54′
Kartonë të verdhë: Boateng, Nesta, El Sharaui/ Tiago Mota
Milan: Abiati, Abate, Nesta, Tiago Silva, Zambrota (Robinjo 66′), Noçerino (Sedorf 80′), Van Bomel, Boateng, Emanuelson, Ibrahimoviç, Pato (El Sharaiu 83′). Trajner: Alegri
Inter: Julio Sesar, Maikon, Lucio, Samuel, Nagatomo, Zaneti, Tiago Mota, Kambiaso, Alvarez (Çivu 67′), Pacini (Forlan 90′), Milito (Shnajder 76′). Trajner: Ranieri

Ndeshjet
Të shtunën
Katania-Roma    1-1
(e ndërprerë nga shiu)
Dje
Çesena-Novara    3-1
Shënues: Mutu 20′, 39′ (p), Rinaudo 45′ (autg)/ Morimoto 89′
Kievo-Palermo    1-0
Shënues: Samarko 50′
Fiorentina-Leçe    0-1
Shënues: Di Mikele 66′ (p)
Juventus-Kaljari    1-1
Shënues: Vuçiniç 7’/
Kosu 48′
Parma-Siena    3-1
Shënues: Biabiani 24′, Valiani 66′, Xhovinko 90’/ Grosi 79′
Milan-Inter    0-1
Shënues: Milito 54′
Xhenoa-Udinese    3-2
Shënues: Grankvist 49′, Jankoviç 50′, Palasio 71′ / Ferroneti 14′, Di Natale 75′ (p)
Lacio-Atalanta    2-0
Shënues: Hernanes 20′ (p), Klose 91′

Renditja
Nr. Ekipi    P    ND
1. Juventus       38     18
2. Milan       37     18
3. Udinese       35     18
4. Lazio       33     18
5. Inter       32     18
6. Napoli      27     17
7. Roma       27     17
8. Xhenoa      24     18
9. Kievo      23     18
10. Katania       22     17
11. Kaljari       22     18
12. Parma      22     18
13. Fiorentina 21     18
14. Palermo       21     18
15. Atalanta       20     18
16. Bolonja       18     17
17. Siena      18     18
18. Çesena       15     18
19. Leçe      12     18
20. Novara       12     18

© Panorama.al