Aktivistja Luçiana Kokaj tha sot nga sheshi i protestës në ditën e 53-të të revoltës popullore para Kryeministrisë, se çështja e pronave të Rrjollit ka kaluar të gjitha fazat e drejtësisë dhe tani ndodhet në Gjykatën e Lartë, kurse oligarkët dhe pushtetarët e implikuar, nuk do t’i gëzonin dot.
Ajo vuri në dukje se ishin kryer shumë vepra penale e falsifikime për t’i tjetërsuar pronat e Rrjollit, duke shtuar se banorët posedojnë dokumente prej dhjetëra vitesh të trashëguara për ato prona.
“Kryeministri bëri një takim atje me administratën dhe me zyrtarët vendorë (Theth). I jap një përgjigje kryeministrit, se ne nuk kemi një dokument të vetëm, por kemi të gjitha dokumentet për t’u kthyer pronat ish-pronarëve. E dini cila është përgjigja që japin kur shkon atje për pronën, se nuk e japin dot pronën. Do ishte një deputet i Parlamentit shqiptar ai që do merrte pronën atje në Rrjoll. E dini se çfarë ndodh, u mbyll hetimi dhe prokurorët që u shkarkuan nga Vettingu u bënë avokatë të kompanive që morën pronën atje. Ne nuk kemi një dokument zoti kryeministër, ne kemi të gjitha dokumentet që në kohën e komunizmit kur u morën ato prona. Ne kemi vendime gjykate zoti kryeministër për pronat tona, çështja e jonë është në Gjykatën e Lartë”, ishte mesazhi i Kokajt për kryeministrin.
Dhe shtoi se:
“Çeta e mikrofonit që është sulmuar ka bërë një gjë që s’e ka bërë askush. Gjithsecili po flet për problemet për të cilat nuk është dëgjuar në vendet ku paguajmë taksa për të na dhënë zgjidhje. Kryeministri bëri mbledhje jo me banorët e Thethit, por me punonjës administrate dhe militantë. Por nuk ta falin Thethi, Rrjolli, Zvërneci, Kurdaria dhe Pogradeci”.
Më tej ajo i bëri apel kreut të qeverisë që të takohej me burra të vërtetë dhe jo me “zarat” e tij të administratës, duke i kujtuar takimin e Thethit.
“Gjithmonë kemi pasur përballë njerëz sharlatanë që rrinë afër jush zoti kryeministër. Zoti kryeministër, bëhu burrë dhe hajde tako malësorët dhe jo zarat e tu! Historinë nuk e ndryshoni s me hipoteka dhe as me dokumente të falsifikuara. Zoti kryeministër, kur flet për tokat e Rrjollit mendoje mirë, pyet ata njerëzit e ty që janë të përfshirë aty para e të flasësh. Sepse nuk e ndryshoni dot historinë dhe as të vërtetën. Dhe ta dini mirë ju dhe oligarkët e tjerë se tokën e Rrjollit nuk do ta gëzoni. Rrjolli është zonë e mbrojtur”, u shpreh aktivistja.
Kokaj iu përgjigj edhe deklaratave të kryeministrit lidhur me dokumentet e pronësisë.
“Ne nuk kemi dokumente, kryeministër, por kemi ato që ndodhen në Agjencinë e Pronave. Ata nuk na japin dot pronat, maksimumi na japin një përgjigje negative. Sa për prokurorinë, pyet Ulsiun tënd kur ishte prokuror pse u mbyll dosja. Ne kemi dokumente të vitit 1947, vendime gjykate të viteve 1996, 2001, 2008 dhe 2026 që vërtetojnë pronësinë tonë,” deklaroi ajo.
Ajo akuzoi se në zonë po ndërtohet në favor të oligarkëve, duke përmendur edhe emrin e ish-ministres Belinda Balluku.
“Çështja e Rrjollit ua njohu pronën rrjollarëve, por përballë kemi pasur njerëz që financojnë fushatat e tua. Ata që ndërtojnë në Rrjoll janë oligarkë, të cilëve Belinda Balluku u bën nderet e jetës dhe këtë e thotë SPAK,” tha Kokaj.
Kokaj në fund i kujtoi kreut të qeverisë se edhe BE e kishte urdhëruar që të bënte ndryshimet e duhura në ligjin për zonat e mbrojtura dhe jo siç pretendonte ai. Ajo e paralajmëroi Ramën që të mos bënte gabime me pronat dhe zonat e mbrojtura në Shqipëri.
“BE i ka kërkuar kryeministrit të bëjë ndryshimet në ligjin e zonave të mbrojtura dhe të ndalojë ndërtimet në zonat e mbrojtura. Ndaj mos bëj gabime me zonat e mbrojtura dhe as me pronat”, u shpreh Kokaj.
© Panorama.al
