Zjarrfikësit luftuan me flakët në Spanjë për të vënë nën kontroll zjarrin më të madh të vitit, ndërsa dy zjarrfikës vdiqën në një zjarr në Francën jugperëndimore.
Temperaturat e larta vazhduan të godisnin Evropën, me një mot gjithnjë e më të paqëndrueshëm që shkaktoi thatësirë dhe parashikime që paralajmëronin për breshër të madh në zonën e Ballkanit.
Një zjarr pyjor në provincën qendrore spanjolle të Guadalajarës ka qenë duke u djegur për të gjashtën ditë me radhë, me autoritetet që kanë evakuuar më shumë se 1,200 persona në Spanjë.
Shërbimet e emergjencës po punojnë për të kontrolluar flakët ndërsa temperaturat u rritën mbi 40 gradë Celsius, duke rritur rrezikun e zjarrit në nivele të rrezikshme, më pak se dy javë pasi zjarri më vdekjeprurës në Spanjë në dekada vrau 13 persona pranë Bendarit, në provincën jugore të Almerias.
Në Britani , kompania e ujësjellësit Thames Water njoftoi se do të zbatojë kufizime në përdorimin e ujit për 10 milionë klientë që furnizon me ujë të pijshëm në Londër dhe përreth saj, duke ndaluar përdorimin e tubave të jashtëm, spërkatësve dhe larësve me presion të lartë për të kursyer furnizime.
Anglia ka marrë vetëm 3% të reshjeve mesatare afatgjatë të korrikut, me jugun dhe lindjen e vendit që nuk kanë përjetuar shi deri më tani, thatësira më e gjatë që nga mesi i viteve 1990, tha Ekipi Kombëtar i Thatësirës i qeverisë britanike.
Ndërkohë, në Shqipëri, banorët dhe turistët po kërkojnë pak lehtësim nga temperaturat përvëluese te shatërvanët.
“Betohem në Zot, temperaturat janë shumë të larta sot. Është 42 gradë Celsius. Nuk mund ta përballosh këtë pa ujë të ftohtë”, tha banori i Tiranës, Ferid Salihu.
Në Serbi, niveli i ujit në Danub ka rënë në nivelin më të ulët që nga viti 1946, duke i detyruar barkat dhe anijet të transportojnë ngarkesa më të lehta për të kaluar nëpër pjesët serbe të lumenjve Danub dhe Sava, thanë zyrtarët.
Në të njëjtën kohë, autoritetet në Ballkanin Perëndimor po paralajmërojnë për një ndryshim të motit, nga valët e të nxehtit në breshër. Disa persona u plagosën lehtë nga breshëri në vendpushimin kroat të Rovinjit, në bregdetin e Adriatikut, raportuan mediat kroate.
Stuhitë do të shtrihen në Slloveni, në veri, duke kaluar nëpër Bosnjë dhe Hercegovinë dhe Serbinë jugore deri në Maqedoninë e Veriut, sipas parashikimeve të meteorologëve.
© Panorama.al— Reuters (@Reuters) July 21, 2026
