Miliona tifozë në të gjithë botën po ndjekin finalen e madhe të Kupës së Botës 2026 mes Spanjës dhe Argjentinës, ndërsa për herë të parë në historinë e turneut, në pushimin mes dy pjesëve u zhvillua një spektakël madhështor muzikor.
Në skenën e ngritur për këtë rast performuan disa nga emrat më të njohur të muzikës botërore, duke e kthyer pushimin e finales së Botërorit 2026 në një nga momentet më të ndritura të gjithë organizimit.
E para që u ngjit në skenë ishte Madonna, e cila hapi spektaklin me këngën “Music”. Ylli i pop-it mbërriti në fushë me një makinë ku ndodheshin edhe Ronaldo dhe Ronaldinho, për të dalë më pas së bashku në stadium.
Shfaqja vijoi me një performancë të frymëzuar nga “The Muppet Show”, si dhe me dirigjentin Gustavo Dudamel. Më pas ishte radha e grupit koreano-jugor BTS, që interpretoi hitin “Dynamite”.
Në fushë u shfaq edhe aktori Jason Sudeikis, i njohur nga seriali “Ted Lasso”, ndërsa Justin Bieber interpretoi këngën “Everything Hallelujah”, duke luajtur njëkohësisht edhe në kitarë.
Shakira performoi këngën zyrtare të Botërorit, “Dai Dai”, së bashku me Burna Boy, ndërsa në fund të interpretimit përqafoi disa fëmijë në fushë.
Në ekranet gjigante të stadiumit u shfaq legjenda e futbollit Pelé, ndërsa në fushë u panë edhe personazhet e njohur Miss Piggy dhe Kermit.
Spektakli kishte edhe një karakter bamirësie, pasi një pjesë e të ardhurave do të shkojë për financimin e programeve arsimore që zhvillohen nga FIFA dhe organizata Global Citizen.
