Pankartat e protestuesve në tubimin e djeshëm kundër qeverisë dhe kryeministrit Edi Rama rikthyen në vëmendje hetimin e SPAK ndaj ish- zëvendëskryeministres Belinda Balluku.
Me ironi, qytetarët i janë referuar kërkesës së Ramës për “besë” ndaj shqiptarëve, pas prezantimit të dokumentit që sipas tij synon një reflektim të qeverisë dhe një kthesë në qeverisje pas protestave masive kundër tij.
Një prej pankartave kryesore të protestës me foton e Ramës shkruante: “BELINDA KA NJË HALL ME SPAK. NA DUHET EDHE NJË HERË ME DHËNË ‘BESËN’”, duke iu referuar hetimit të Prokurorisë së Posaçme ndaj Ballukut.
Në pankartat e tjera, protestuesit ironizuan marrëdhënien mes “besës” që Rama kërkon nga shqiptarët dhe politikës së ndjekur nga qeveria e tij.
“Jepi besën Ramës që të pasurohet Belinda, e të ngrejë vila Zegjinëja” ishte një tjetër mesazh i shfaqur në protestë, ndërsa një tjetër shkruante: “Besa pa besë, qeverisje pa shpresë!”
