“BBC Global Woman” ka sjellë në vëmendje protestat masive që po zhvillohen në Tiranë kundër qeverisë së Edi Ramës, duke vënë theksin se ata nisën kundër ndërtimit të një projekti në zonën e mbrojtur të Zvërnecit.
Media përmend se protestat kanë marrë mbështetjen e këngëtares shqiptare me famë botërore, Dua Lipa, e cila i konsideroi si frymëzuese gjatë podcastit që zhvilloi me shkrimtaren Lea Ypi.
“Në një episod të podkastit të Dua Lipës i cili u publikua më 14 korrik, këngëtarja, prindërit e së cilës janë shqiptarë nga Kosova, i tha të ftuarës së saj, autores dhe akademikes shqiptare Lea Ypi: “E gjej shumë frymëzuese ta shoh sa shumë u intereson njerëzve, e dini, ditë pas dite ata po dalin në rrugë.”, citon media.
Artikulli i plotë:
“Nëse do të isha në Shtetet e Bashkuara dhe ata do të ndërtonin një resort me pesë yje në Kanionin e Madh, do të mërzitesha shumë sepse është një thesar kombëtar. Kështu është edhe Zvërneci këtu për Shqipërinë”, tha për Reuters studenti 23-vjeçar Asllan Llani Dogjani në ditën e 33-të të të ashtuquajturave protesta Flamingo.
Mijëra njerëz kanë dalë në rrugët e kryeqytetit të Shqipërisë, Tiranës, që nga fundi i majit duke kërkuar anulimin e një zhvillimi luksoz turistik që do të ndërtohet në ishullin e Sazanit të vendosur në Detin Adriatik pranë brigjeve të Vlorës, në Shqipëri. Zhvillimi thuhet se lidhet me Ivanka Trump dhe dhëndrin e Presidentit të SHBA-së, Jared Kushner, pasi ata ndodhën në ishull.
Kur u pyet nga BBC për koment, partneri i biznesit të Kushner, Asher Abehsera, tha se projekti është i përqendruar në “administrimin e përgjegjshëm” dhe përmirësimin e mjedisit, si dhe krijimin e vendeve të punës dhe vlerës për komunitetet lokale.
Protestat janë quajtur Revolucioni i Flamingove sepse vendpushimi prej 1.4 miliardë eurosh (1.6 miliardë dollarë) do të zhvillohet pranë një kënete të mbrojtur ku jetojnë flamingo, foka dhe vende folezimi të breshkave të detit.
BBC kontaktoi Organizatën Trump për koment në qershor, por nuk mori përgjigje.
Kryeministri Edi Rama e ka mbrojtur projektin dhe thotë se nuk kishte “asnjë shans” që zhvillimi të ndalej ndërsa ai ishte udhëheqës.
Në një episod të podkastit të Dua Lipës i cili u publikua më 14 korrik, këngëtarja, prindërit e së cilës janë shqiptarë nga Kosova, i tha të ftuarës së saj, autores dhe akademikes shqiptare Lea Ypi: “E gjej shumë frymëzuese ta shoh sa shumë u intereson njerëzve, e dini, ditë pas dite ata po dalin në rrugë.”
© Panorama.al
