Berisha: “E vetmja rrugë”, slogani që përsëritej qindra herë nga Enveri

Nga Lushnja dhe Vlora, kryeministri Sali Berisha ka prezantuar kandidatët për kryetarë bashkish të këtyre qyteteve, por edhe projektet përkatëse. Duke theksuar se alternativa e djathtë bazohet në fonde dhe financime, në mund e djersë, në vlera morale të qytetarëve të lirë, në besimin e qytetarëve te vetja, te njëri-tjetri, te familja, te vendi, Berisha tregoi njëkohësisht dhe alternativën e kundërshtarit të tij politik, kryesocialistit Edi Rama. “Alternativa tjetër është alternativa e të vetmes rrugë. Të dashur të reja e të rinj, ju nuk e dini se çfarë ka qenë ajo. Pyesni baballarët e gjyshërit tuaj. Do t’ju rrëfejnë se e vetmja rrugë ishte slogani që përsëritej në çdo faqe, në çdo shkrim, në çdo emision, në çdo gazetë, dhjetëra e qindra herë në ditë, nga diktatori Enver Hoxha. Le t’ua lëmë nostalgjikëve të tij rrugën e vetme”, tha Berisha, teksa prezantoi kandidatin Albert Sanxhaku në Lushnjë.
Duke kaluar më pas në Vlorë, ku mbështeti kandidatin Ardian Kollozi, lideri demokrat theksoi se arma sekrete e maxhorancës në këto zgjedhje vendore është besimi te qytetarët. “Ftoj më 8 maj të vlerësoni bindjet tuaja se Vlora mund të bëhet një nga qytetet më të zhvilluara të Mesdheut. Ju zgjidhni të nisni betejën e madhe të shndërrimit të kantierit të madh të punësimit”, tha kryetari i PD-së. Sipas tij, Vlora ka potenciale të jashtëzakonshme të prodhimit industrial, ndërsa shtoi se qyteti do të ketë planin dhe sistemin urbanistik më modern në 6 muajt e parë. “Një apel dhe thirrje miqësore do t’u drejtoj atyre që ndjekin këtë miting. Ju ftoj të na bashkoheni në shtëpinë tonë, në Vlorën tonë”, përfundoi Kryeministri.

© Panorama.al