BBC njoftoi se po heton akuzat e reja, të botuara në gazetën ‘The Telegraph’, në lidhje me redaktimin e një fjalimi të Presidentit të SHBA-së Donald Trump nga një tjetër program i saj.
Transmetuesi publik i Britanisë është zhytur në krizën më të madhe në dekada, pasi dy drejtues të lartë dhanë dorëheqjen mes akuzave për paragjykime dhe mënyrës se si një fjalim i Trump u redaktua nga emisioni.
Presidenti amerikan po kërcënon të ngrejë një padi, duke kërkuar 1 miliard dollarë dëmshpërblim.
Gazeta ‘Telegraph’, e cila e raportoi e para çështjen, raportoi sot se një tjetër program i BBC-së, Newsnight, gjithashtu e redaktoi në mënyrë selektive të njëjtin fjalim të Trump në qershor 2022, dy vjet para emisionit. Ky redaktim ishte i ngjashëm me atë të programit.
“BBC i përmbahet standardeve më të larta gazetareske”, tha një zëdhënës, duke iu përgjigjur raportit të Telegraph. “Kjo çështje na është sjellë në vëmendje dhe ne po e shqyrtojmë”, shtoi ajo.
Të hënën, BBC kërkoi falje për transmetimin e saj, i cili ndërthurte tre pjesë të fjalimit të Trump më 6 janar 2021, kur mbështetësit e presidentit republikan sulmuan Kapitolin. Fjalimi i redaktuar dha përshtypjen se Trump nxiti dhunën.
Avokatët e Trump thanë se BBC duhet ta tërheqë dokumentarin deri nesër, të premten, më 14 nëntor, përndryshe do të ngrenë një padi për “të paktën” 1 miliard dollarë. Ata gjithashtu duan që BBC të kërkojë falje dhe të kompensojë Trumpin për dëmtimin e reputacionit të tij dhe shkaktimin e “dëmit financiar”.
© Panorama.al
