Raporti i votave në Tiranë ndahet në mënyrë të barabartë midis kandidatëve, edhe nëse bëhen krahasimet me votat për Këshillin Bashkiak.Sipas rezultateve të KQZ-së, Basha e Rama ndahen me një diferencë prej 81 votash, ndërsa të dy kanë marrë pothuaj 7 mijë vota më shumë se koalicioni që i mbështeste të Tiranë. Votat jashtë koalicionit i përkasin vetëm Lëvizjes për Zhvillim Kombëtar dhe Partisë Komuniste, e cila kishte kandidatin e vet në garë. LZHK ka marrë 3675 vota, ndërsa PKSH 447 vota. Nga ana tjetër, Komisioni Qendror i Zgjedhjeve ka konfirmuar se në Tiranë ka pasur rreth 18 480 vota të pavlefshme, nga të cilat 12 200 vota u përkasin votave për Këshillin Bashkiak. Në total llogariten rreth 6 për qind e votave të pavlefshme për Këshillin Bashkiak, ndërsa në votat e kandidatëve kjo shifër është dy herë më e vogël me 6300 vota, ose rreth 3 për qind.
Diferencat
Kandidati demokrat, Lulzim Basha, ka marrë vota më shumë se partia kryesore që e mbështeste, Partia Demokratike. PD ka marrë 74 530 vota në Tiranë, ose në këtë rast, Basha ka marrë 50 256 vota më shumë. Nga ana tjetër, PS ka marrë 100 783 vota në Tiranë dhe Rama ka marrë 23 923 vota më shumë. Në këto shifra, Basha ma marrë dyfish mbështetje më shumë se partia që i ka mbështetur kandidatët. Rritje ka edhe kandidati Milloshi, i cili ka marrë 3 herë më shumë se partia e tij në proporcional. Nëse komunistët kanë marrë 447 vota në Këshill, kandidati Milloshi ka marrë 1394 vota.
Koalicionet
Koalicioni i djathtë “Aleanca për qytetarin”, i drejtuar nga Partia Demokratike, me 117 717 vota, ka marrë 28 këshilltarë, nga 55 që ka Këshilli Bashkiak i Tiranës. Koalicioni “Aleanca për të ardhmen”, i kryesuar nga Partia Socialiste, me 117 166 vota, ka marrë 27 këshilltarë. Nisur nga filozofia se si u ndërtuan këto koalicione, Partia Demokratike e ka ndarë numrin e këshill-tarëve dhe me parti të tjera, duke marrë vetë 19 këshilltarë, e ndjekur nga Lëvizja Socialiste për Integrim me 5 këshilltarë, Partia për Drejtësi, Integrim dhe Unitet me 2 këshilltarë e më pas Partia Republikane dhe Partia e Legalitetit me nga një këshilltar secila. Ndërsa në koalicionin “Aleanca për të ardhmen”, PS ka marrë një numër më të madh këshillt-arësh, 25, dhe dy parti përbërëse të këtij koalicioni, Demokracia Sociale dhe PSV ’91, kanë marrë nga një këshilltar. Partia Socialiste ka marrë në Tiranë 100 783 vota, ndërsa Partia Demokratike ka marrë 74 530 vota, por pa mundur të përcaktojë shumicën e Këshillit Bashkiak. Në këto shifra, aleatët e Partisë Demokratike kanë pothuaj tri herë më shumë vota se aleatët e PS-së për Këshillin Bashkiak në Tiranë. Nga ana tjetër, PS është forca e parë, me një diferencë prej 26 mijë votash afërsisht më shumë se Partia Demokratike. Koalicioni “Aleanca për qytetarin” do të ketë shumicën në Këshillin Bashkiak, duke pasur një këshilltar më shumë se koalicioni i opozitës.
124 786 vota
në total ka marrë kandidati demokrat për Bashkinë e Tiranës, Lulzim Basha, duke llogaritur edhe votat pas hapjes së 122 kutive në Komisionin Qendror të Zgjedhjeve
124 705 vota
në total ka marrë kandidati socialist, Edi Rama, për Bashkinë e Tiranës, duke llogaritur edhe votat pas hapjes së 122 kutive në Komisionin Qendror të Zgjedhjeve
Minibashkitë, 9 këshilla i udhëheq koalicioni i PD
Rezultati i votave në proporcional për 11 minibashkitë në Tiranë tregon se këshillat e tyre do të dominohen nga koalicioni qeveritar. Sipas rezultateve, koalicioni i opozitës ka siguruar shumicën në Minibashkinë Nr. 5 dhe me një diferencë të vogël do të ketë shumicën në Minibashkinë Nr 6. Nga ana tjetër, koalicioni qeveritar do të ketë shumicën me të paktën një anëtar më shumë edhe në minibashkitë 1 dhe 7, të cilat janë fituar nga koalicioni i opozitës. Me një diferencë të ngushtë, koalicioni i PD-së do të ketë shumicën edhe në minibashkitë 4 dhe 3. Nga ana tjetër, koalicioni i PD do të ketë një shumicë më të gjerë në Minibashkinë Nr. 2, në Minibashkinë Nr. 8, Minibashkinë Nr. 9, Minibashkinë Nr. 10, si dhe në Minibashkinë Nr. 11. Së bashku me aleatët, kryesisht LSI-në, PR-në dhe PDIU-në, koalicioni qeveritar do të ketë shumicën e këshillave të minibashkive në Tiranë.
Rezultatet në Tiranë
Rezultatet për kandidatët
Lulzim Basha 124 786 vota
Edi Rama 124 705 vota
Hysni Milloshi 1394 vota
Të pavlefshme 6300 vota
Rezultatet në Këshill Bashkiak
Aleanca për Qytetarin 117 717 vota
Partia Demokratike 74 530 vota
Aleatët 43 187 vota
Aleanca për të Ardhmen 117 166 vota
Partia Socialiste 100 783 vota
Aleatët 16 383 vota
Jashtë koalicionit (Këshill Bashkiak)
LZHK 3675 vota
PKSH 447 vota
Të pavlefshme 12 200 vota
ERALD KAPRI
© Panorama.al
