Nata mes së shtunës dhe së dielës është shoqëruar me sulme të reja në Ukrainë dhe Rusi, teksa shpërthime të fuqishme janë dëgjuar në Kiev, ndërsa një depo nafte në rajonin rus të Stavropolit është goditur sërish.
Sipas një korrespondenti të AFP-së që ndodhej në kryeqytetin ukrainas, disa shpërthime tronditën Kievin gjatë natës.
Njëri prej tyre ishte aq i fortë, sa aktivizoi alarmet e automjeteve të parkuara në qendër të qytetit.
Ndërkohë, në Rusi, depoja e naftës në Mikhailovsk, në rajonin e Stavropolit, u vu përsëri në shënjestër të sulmeve. Sipas raportimeve paraprake, objekti është goditur dhe brenda tij kanë shpërthyer disa vatra të veçanta zjarri.
Deri tani nuk ka informacione zyrtare për viktima apo përmasat e dëmeve, ndërsa autoritetet e të dy vendeve nuk kanë dhënë ende detaje të plota mbi incidentet.
Situata mbetet e tensionuar, me sulmet që vijojnë në të dyja anët e frontit.
© Panorama.al
