Është ndarë nga jeta babai i këngëtares dhe deputetes kosovare, Eliza Hoxha.
Lajmi për ndarjen nga jeta të muzikantit Shefqet Hoxha u dha nga vetë Eliza Hoxha dhe vëllai i saj në një postim në rrjetet sociale.
“Me pikëllim të thellë ju njoftojmë se sot me datë 19.08.2021 ndërroi jetë Babai, Gjyshi dhe i dashuri ynë Shefqet Hoxha.
Njoftojmë familjarët, miqtë, kolegët dhe të gjithë dashamirët se varrimi i të ndjerit do të bëhet sot në varrezat e Prishtinës në Arbëri (Dragodan) me ikindi në ora 16:30”– shkruhet në postim.
Kujtojmë që në muajin mars të këtij viti, deputetja PDK-së njoftoi se babai i saj ishte në gjendje të rëndë shëndetësore pasi ishte infektuar me COVID-19.
Në një postim në Facebook në atë kohë, ajo kërkoi ndihmë nga qytetarët për ti siguruar plazmën e gjakut që i nevojitet të atit.
“E kemi me urgjencë të sigurojmë plazmën e gjakut për babin, andaj persona që kane vullnetin e mire dhe sapo e kane kaluar Covidin e që e kanë grupin e gjakut A-Pozitiv apo A-Negativ të lajmërohen në QKUK, Transfuzionin e gjakut për dhurim nesër e pasnesër deri ne ora 14:00. Na duhen dhurues me minimum 50+ antitrupa. Ju falënderoj paraprakisht për vullnetin e mirë dhe ndihmën”- shkroi ajo.
Eliza Hoxha gjatë intervistave ka treguar se frymëzimin për t’u marrë me muzikë e kishte marrë nga babai i saj.
Madje ai ka qenë kompozitor dhe tekstshkrues i shumë këngëve të saj kur ishte fëmijë, periudhë kur sapo kishte nisur rrugëtimin e saj muzikor.
/PANORAMAPLUS.AL
