Pas disa vitesh që iu bashkua stafit të spektaklit të humorit “Portokalli”, si moderatore në treshen me Salsano Rapin dhe Eneda Tarifën, tashmë Xhemi Shehu është shndërruar në kryepersonazhin e show-t. Përveç moderimit, ajo ka bërë përshtypje me talentin e saj të aktrimit në rubrikën “Atentatet”, ku gjatë interpretimit u bashkohet dhe Florian Binaj. Për këtë sezon të ri, ajo ka konfirmuar vazhdimin e punës në “Top Channel”, duke postuar një foto nga ky televizion me dy miqtë e saj, Arbana Osmanin dhe Eno Popin.
Në postimin ku uron Enon për programin e ri ka marrë komente nga miqtë, të cilët i etiketojnë si “figurat relike” të këtij televizioni, pas largimeve të shumta. Ndërkohë, mësohet se Xhemi do të vazhdojë të njëjtin angazhim në televizion, si prezantuese e spektaklit të humorit në krah të Salsano Rrapit. Por puna në televizion nuk është i vetmi angazhim i nënës së dy djemve. Ajo është e angazhuar paralelisht me një qendër estetike në Tiranë, për trajtime bukurie.
Xhemi kështu i shtohet listës së vajzave të ekranit, që përveç punës në televizion, menaxhojnë bizneset e tyre paralelisht, mes të cilave; Valbona Selimllari, Alketa Vejsiu, Amarda Toska, Rozana Radi etj.. Sa i takon showt ajo vjen edhe këtë herë si protagoniste e roleve më emblematike të kinemasë shqiptare ndër vite, kësaj here në formën e parodisë, që padyshim ka dhe ajo specifikën e vet në aktrim. Deri tani e kemi parë se shpesh në ngjyrat bardhë e zi ajo ri sjell në kohë dhe nota humori personazhet e famshme femërore të ish-Kinostudios “Shqipëria e re”, eksperiencë që e ka filluar me filmat: “Njeriu me top”, “Shpyllëzimi i lirisë’, “Rrugë të bardha”, “Gjeneral Gramafoni”.
Pas largimit të Eneda Tarifës nga “Portokalli”, për të ndjekur turin e Festivalit Europian Xhemin e pamë protagoniste në role kryesore si; ish-shoqja e Benit te “Beni ecën vetë’, partizanin dyshues te “Dueli i heshtur”, apo Madalenën e rraskapitur nga xhelozia e të shoqit te “Fjalë pa fund”. E pyetur në një intervistë nga gazeta “Panorama” për talentin e saj të fshehur si aktore dhe këtë eksperiencë ndryshe në punën e saj shumëvjeçare në televizion, ajo është shprehur: “Nuk kam ç’të them tjetër përveç që më gëzon fakti që njerëzit më kanë pritur mirë në këto role”.
Moderatorja e njohur e disa formateve shumë të rëndësishme në televizion, u rikthye në spektaklin e humorit “Portokalli”, disa vite pasi ajo ishte pjesë e prezantimit përgjatë një sezoni në vitin 2006, bashkë me moderatorët e asokohe, Agron Llakaj dhe Amarda Toska. Shumë pak kohë pas lindjes së djalit të dytë, Gabriel, Xhemi Shehu u rikthye në ekranin e “Top Channel” pikërisht si moderatore e të njëjtit spektakël “Portokalli”, ndërkohë që e kishim parë në programe të rëndësishme për vite me radhë. Nga java në javë, ajo u pa të dilte nga kornizat e thjesht prezantueses së çlirët para kamerave, duke u shfaqur si një “show girl”, ashtu siç është dhe tendenca për personazhet televizive, që dinë t’i bëjnë të gjitha në ekran.
PANORAMA PLUS
NDIQE LIVE "PANORAMA TV" © Panoramaplus.al