Modelja britanike, Nyome Nicholas-Williams nisi 3 muaj më parë një fushatë në Instagram me hashtagun #iwanttoseenyome, sepse rrjeti social fshiu disa foto të saj me pretekstin se zbulonin më shumë seç duhej.
Nyome publikoi në gusht një fotografi ‘topless’ dhe gjoksin e mbulonte me duar, por Instagrami e fshiu direkt foton, raporton “The Guardian”.
Modelja reagoi menjëherë ashpër pas kësaj, duke u shprehur se nuk arrin të kuptojë pse fotografitë nudo të Kim Kardashian dhe Emily Ratjakowski lejohen, ndërsa të modeleve të kolme hiqen.
Më pas u konfirmua se platforma po diskriminonte vazhdimisht njerëzit me ngjyrë dhe komunitetet e tjera të margjinalizuara, duke fshirë postimet e tyre dhe duke mos i promovuar ata në të njëjtën mënyrë si njerëzit e bardhë.
Gjatë fushatës Nyome mblodhi 20 mijë firma përmes një peticioni dhe pas disa muajsh Instagrami rregulloi politikat në lidhje me fotot nudo.
“Me përditësimin e ri, ne do të lejojmë përmbajtjet ku dikush thjesht përqafon ose mbulon gjoksin e tij me duar.
Dhe, nëse ka ndonjë dyshim, do të kërkojmë që vlerësuesit të lejojnë që përmbajtja të qëndrojë apo jo”, ka njoftuar Instagram pas ndryshimeve.
Politika e re për lakuriqësinë do të zbatohet në Instagram dhe Facebook dhe do të hyjë në fuqi këtë javë.
Megjithatë Instagram dhe Facebook nuk do të lejojnë fotot provokuese ose nëse ka ndryshim të dukshëm në formën e gjinjve.
NDIQE LIVE "PANORAMA TV" © Panoramaplus.al