Një park lojërash në Kinë ka vendosur të ofrojë përvojën më të ngjashme që një njeri mund të marrë, nëse do të kishte qenë pjesëtar në bordin e anijes së famshme Titanik.
Një model i ngjashëm i anijes së mbytur po ndërtohet në Daying County në provincën Sichuan.
E quajtur “Titaniku që s’mbytet”, anija ka të njëjtat përmasa me origjinalin: 269.06 metra e gjatë dhe 28,19 metra e gjerë.
Anija do jetë në qendër të parkut të quajtur Romandisea dhe do të ketë të njëjtat kushte me Titanikun, duke përfshirë këtu sallat e banketeve, teatro, kuvertat e vëzhgimit dhe një pishinë.
Turistët do të mund të paguajnë për të kaluar natën në anijen e famshme, e cila do të jetë e ankoruar në mënyrë të përhershme disa milja larg detit në një rezervuar në lumin Qijiang, rreth 130 km nga Chengdu, kryeqyteti i provincës.
Data e hapjes së parkut ende nuk është caktuar.
Punimet për ndërtimin e anijes nisën në vitin 2016. Sipas AFP janë dashur rreth 23 mijë ton çelik dhe kostoja e ndërtimint shkon rreth 153.5 mln dollarë. Kjo nuk është kopja e vetme e Titanikut, që është propozuar të ndërtohet.
Në vitin 2018, kompania australiane Blue Star Line bëri të ditur, se do të riniste punimet për Titanic II pas disa vonesave të gjata. Promovuan ndërtimin e një kopjeje identike të anijes së famshme, e cila përmban 835 kabina për të akomoduar gjithsej 2,435 pasagjerë.
Udhëtimi i parë thuhej, se do të ndërmerrej në vitin 2022, por faqja zyrtare e kompanisë australiane nuk është rifreskuar që në vitin 2018.
CNN ka kontaktuar me Blue Star Line për të marrë ndonjë koment në lidhje me statusin e anijes.
NDIQE LIVE "PANORAMA TV" © Panoramaplus.al