Vitin e kaluar, Jonida Vokshi dhe bashkëshorti i saj, Besnik Krapi, u bënë prindër për herë të parë.
Dyshja u bekuan me një vajzë, të cilën vendosën ta quanin Emi. Ndonëse nuk kanë kaluar shumë kohë, çifti i njohur mendojnë që tani për zgjerimin e familjes.
Mbrëmjen e djeshme, teksa ishte e ftuar në “Kurthin e Piter Pan”, Jonidës iu desh t’u përgjigjej pyetjeve të fëmijëve edhe në lidhje me jetën private.
“Kur do të bëhesh nëna e një djali?”– e pyeti njëri nga të vegjlit.
“Në fakt, për këtë Besniku ka thënë se duhet të bëjmë edhe një vajzë dhe pastaj do bëjmë një çun. Dhe meqë kështu do burri, ia lëmë në dorë burrit”,- tha aktorja duke qeshur.
Si çdo prind i ri, edhe Jonida me bashkëshortin e saj nuk kanë ditur se si ta mbajnë një fëmijë të porsalindur, duke pasur parasysh brishtësinë e tyre.
Ndër të tjera, Vokshi tregoi se pas lindjes, Emi qante shumë për shkak të dhimbjeve të barkut dhe për këtë arsye, Besniku kishte nisur të lexonte dhe të praktikonte metoda të ndryshme për ta qetësuar.
Fatmirësisht, ai arrinte t’ia largonte sikletin të voglës, por Jonida kishte një problem shumë të madh: pse Emi qetësohej me Besnikun dhe jo me të?
Kjo ka qenë arsyeja pse moderatorja është ndjerë aq keq sa ka qarë edhe për një orë e mbyllur në tualet. Madje, me shaka, ajo e cilësoi partnerin e saj si “të poshtër”.
