“21 janari”, Zaganjori: Dosja gjykohet brenda 6-mujorit. 11 mijë dosje në pritje në Gjykatën e Lartë

Kryetari i Gjykatës së Lartë, Xhezair Zaganjori deklaroi se maksimuni brenda gjashtëmujorit të këtij viti do të gjykohet dosja për “21 janarin”.

Në një konferencë për media, teksa bëri analizën e institucionit që drejton, Zaganjori ka thënë se për këtë çështje do të merret vendim duke i dhënë fund zvarritjes në dyert e drejtësisë.

Janë 11 mijë çështje penale dhe civilë në Gjykatën e Lartë dhe ka ende nën proces çështje që i përkasin vitit 2013. 

Sipas Zaganjorit ky ngërç i mbartur vit pas viti që prej 2007-ës u shkaktua fillimisht nga mosplotësimi i vendeve vakante në Gjykatën e Lartë. Pasuar nga fakti që të gjithë i drejtohen me rekurse kësaj gjykate. 

“Mijëra çështje, pothuajse të gjitha, vijnë për shqyrtim edhe në Gjykatën e Lartë. Duhet të ketë një detyrim financiar, duhet të merret pëlqimi, mendimi, mund të ketë një verifikim me raportet ligjore. Në këtë kendvështrim mund të verifikohet rekursi dhe pastaj të jepet leja apo pëlqimi. Nga ana tjetër te çështjet penale ka shumë vend për të rregulluar me ligj për të përcaktuar më qartë çështjet që kanë të bëjnë drejtpërdrejtë me gjykimin e shkurtuar, me gjykimin në mungesë”, tha Zaganjori.