Presidenti i Ukrainës, Volodymyr Zelensky, ka kërkuar dorëheqjen e ministrit të Drejtësisë dhe atij të Energjisë, duke theksuar se vendimi lidhet me nevojën për transparencë dhe llogaridhënie, në një kohë kur sektori energjetik përballet me akuza për korrupsion.
Zelensky deklaroi se “ministri i Drejtësisë dhe ministri i Energjisë nuk mund të qëndrojnë më në pozicionet e tyre”, duke shpjeguar se çështja është mbi të gjitha një “çështje besimi”. Ai shtoi se “nëse ka akuza, duhet të ketë edhe përgjegjësi”.
Presidenti theksoi se vendimi për t’i shkarkuar nga detyra është “i menjëhershëm” dhe se i ka kërkuar kryeministrit të Ukrainës të pranojë dorëheqjet e të dy ministrave.
Njëkohësisht, ai u bëri thirrje anëtarëve të parlamentit ukrainas që të mbështesin këto dorëheqje, duke theksuar se më pas çështja duhet të shqyrtohet në “nivel gjyqësor”.
Zelensky njoftoi gjithashtu se Këshilli i Sigurisë Kombëtare dhe Mbrojtjes i Ukrainës (RNBO) do të marrë një vendim për vendosjen e sanksioneve, pas propozimit të paraqitur nga Këshilli i Ministrave.
Ai nënvizoi se vendi po kalon një periudhë jashtëzakonisht të vështirë, duke u përballur me ndërprerje të energjisë elektrike, sulme ruse dhe humbje të konsiderueshme.
© Panorama.al
