Operacioni emergjent për stabilizimin e zonës së goditur nga rrëshqitjet e tokës ka hyrë në një fazë vendimtare.
Pas demontimit të urës automobilistike të shkatërruar pak ditë më parë, ka nisur puna për devijimin e rrjedhës së Lumit Shkumbin në vendin e njohur si “Arrat e Gurrës”, me synimin për të frenuar erozionin dhe për të krijuar kushtet për ndërhyrje të mëtejshme infrastrukturore.
Mjetet e rënda janë pozicionuar përgjatë shtratit të lumit, ndërsa ekipet teknike po punojnë për hapjen e një kanali të përkohshëm devijues.
Qëllimi kryesor është largimi i rrjedhës nga zona e dëmtuar, ku lëvizja e tokës destabilizoi themelet e urës dhe përshpejtoi fundosjen e segmentit rrugor.
Sipas burimeve në terren, ndërhyrja konsiderohet jetike për të parandaluar zgjerimin e dëmeve, pasi prurjet e lumit rrezikojnë të gërryejnë më tej bazamentin e rrugës kombëtare Librazhd–Prrenjas.
Devijimi pritet të shërbejë si masë mbrojtëse paraprake, duke i hapur rrugë projektimit të një zgjidhjeje të re të qëndrueshme për kalimin automobilistik.
Zona mbetet nën monitorim të vazhdueshëm për shkak të paqëndrueshmërisë gjeologjike, ndërsa specialistët paralajmërojnë se ndërhyrja kërkon koordinim të kujdesshëm për të shmangur përmbytje apo ndryshime të pakontrolluara të shtratit natyror.
Banorët e Dragostunjës dhe drejtuesit e automjeteve që përdorin këtë aks e shohin nisjen e punimeve si një hap pozitiv, por kërkojnë transparencë për afatet dhe garanci për një zgjidhje përfundimtare.
Pas shembjes së urës, kjo zonë është kthyer në një pikë kritike infrastrukturore për qarkun e Librazhdit.
