Liderët e Francës, Gjermanisë, Italisë, Polonisë dhe Mbretërisë së Bashkuar do të zhvillojnë nesër një takim në Berlin, ku në qendër të diskutimeve do të jenë situata në Ukrainë dhe përgatitjet për samitin e NATO-s që do të mbahet më 7 dhe 8 korrik në Ankara.
Në takim do të marrë pjesë përmes videokonference edhe Sekretari i Përgjithshëm i NATO-s.
Sipas një njoftimi të Pallatit Elysee, liderët evropianë do të shqyrtojnë vijimin e mbështetjes për Ukrainën, duke u fokusuar te nismat e shpallura gjatë samitit të fundit të G7, si dhe te vendimet e marra nga vendet e ashtuquajtura “të gatshme” për të mbështetur Kievin me garanci të forta sigurie.
Gjatë konsultimeve do të diskutohen gjithashtu çështjet kryesore që pritet të dominojnë axhendën e samitit të ardhshëm të NATO-s, me theks të veçantë te koordinimi i politikave dhe veprimeve që lidhen me sigurinë e kontinentit evropian.
Në deklaratën e Elysee-së theksohet se takimi do të shërbejë edhe për të intensifikuar përpjekjet për një Evropë më të fortë brenda Aleancës Atlantike, duke nisur nga forcimi dhe zhvillimi i kapaciteteve mbrojtëse evropiane.
Takimi në Berlin vjen në një kohë kur lufta në Ukrainë vazhdon të mbetet një nga sfidat kryesore të sigurisë për Evropën dhe aleatët e NATO-s, ndërsa vendet perëndimore po koordinojnë qëndrimet e tyre përpara samitit të ardhshëm të Aleancës.
© Panorama.al
