Uashingtoni dhe Pekini thuhet se kanë arritur një marrëveshje për të shitur operacionet amerikane të TikTok, te një konsorcium investitorësh, kryesisht me interesa amerikane, të udhëhequr nga Oracle dhe Silver Lake, duke shënuar fundin e një mosmarrëveshjeje shumëvjeçare midis platformës dhe qeverive të të dy vendeve.
Sipas informacionit të cituar nga Semafor, marrëveshja – e cila u përshkrua në një memo të brendshme muajin e kaluar nga CEO i kompanisë mëmë ByteDance – pritet të përfundojë brenda javës.
Ky zhvillim vjen për të mbyllur një cikël pasigurie që zgjati me vite dhe ishte një pikë e përhershme fërkimi në marrëdhëniet SHBA-Kinë, në një periudhë tensionesh të rritura gjeopolitike.
Drejtori ekzekutiv i TikTok, Suh Chu, tha në dhjetor se ByteDance kishte nënshkruar një marrëveshje detyruese me investitorët, por vuri në dukje se rregullatorët ende nuk e kishin dhënë dritën jeshile dhe se “kishte ende punë për t’u bërë”.
Përfundimi i afërt i marrëveshjes sugjeron se pengesat kryesore janë kapërcyer.
Struktura e re e aksioneve
Sipas marrëveshjes, ByteDance do të mbajë një pjesë prej pak më pak se 20% të TikTok në SHBA.
Oracle, Silver Lake dhe MGX, një firmë investimi shtetërore në Emiratet e Bashkuara Arabe me fokus në inteligjencën artificiale, do të zotërojnë secila nga 15%. Grupi i investimeve përfshin gjithashtu Susquehanna, Dragoneer dhe DFO, e cila është në pronësi të Michael Dell.
Çmimi financiar i marrë nga ByteDance nuk është zbuluar. Në shtator, zëvendëspresidenti i SHBA-së J.D. Vance tha se marrëveshja e vlerëson njësinë amerikane të TikTok në rreth 14 miliardë dollarë.
Afatet dhe konteksti politik
Marrëveshja pritet të përmbushë një afat të 22 janarit të vendosur nga administrata Trump përmes një urdhri ekzekutiv që parashikonte një moratorium 120-ditor mbi ndalimin federal.
Ish-Presidenti Joe Biden nënshkroi një ligj në vitin 2024 që kërkonte që ByteDance të hiqte dorë nga TikTok në SHBA ose të përballej me një ndalim të përgjithshëm, duke përmendur shqetësime për sigurinë kombëtare.
Një pikë kyçe ngërçi në negociata ka qenë algoritmi i TikTok, i cili shihet si “çelësi” i suksesit të platformës dhe ka çuar në rrëzimin e marrëveshjeve të mëparshme. Nuk është e qartë se çfarë është rënë dakord saktësisht në lidhje me kontrollin dhe përdorimin e tij.
Sipas memorandumit të brendshëm të Suu Chu, entiteti i ri i pavarur do të ketë përgjegjësinë për mbrojtjen e të dhënave, kontrollin e përmbajtjes dhe sigurinë e algoritmit, ndërsa do të qeveriset nga një bord i ri drejtorësh me shtatë anëtarë, në të cilin shumica e anëtarëve do të jenë amerikanë.
© Panorama.al
