Ambasadori i Bashkimit Evropian, Silvio Gonzato ka zbardhur diskutimet nga takimi që mbajti ditën e sotme me bashkëkryetarët e Komisionit të Reformës Territoriale, Arbjan Mazniku dhe Luçiano Boçi në ambientet e Kuvendit.
Ambasadori e ka cilësuar takimin si konstruktiv, ndërsa thekson nevojën e arritjes së një reforme gjithëpërfshirëse dhe transparente, të ndërtuar mbi të dhëna të sakta dhe me konsensus të gjerë.
Zyrtari i BE thekson se shpejtësia e reformave nuk mund të vijë në kurriz të cilësisë, ndërsa ka kërkuar gjithashtu që të sigurohet që autoritetet vendore të kenë autonomi reale në vendimmarrje.
“Njëkohësisht, është e rëndësishme që funksionet të shoqërohen me financim të mjaftueshëm, në mënyrë që autoritetet vendore të kenë autonomi reale në vendimmarrje, të mbështetur nga kapacitetet e nevojshme.”, ka theksuar ambasadori i Unionit evropian, duke kërkuar që reforma e Territoriales të sjellë shërbime më të mira për qytetarët shqiptarë si dhe të jetë në përputhje me standartet evropiane.
Reagimi i plotë:
Takim konstruktiv sot me bashkëkryetarët Arbjan Mazniku dhe Luçiano Boçi të Komisionit të Posaçëm për Reformën Territoriale dhe Administrative në Kuvendin e Shqipërisë.
Ambasadori i BE-së, Silvio Gonzato, theksoi rëndësinë e një reforme gjithëpërfshirëse dhe plotësisht transparente, të ndërtuar mbi të dhëna të sakta dhe konsensus të gjerë. Shpejtësia e reformave nuk mund të vijë në kurriz të cilësisë dhe rritja e efikasitetit nuk mund të vijë në kurriz të demokracisë vendore.
Njëkohësisht, është e rëndësishme që funksionet të shoqërohen me financim të mjaftueshëm, në mënyrë që autoritetet vendore të kenë autonomi reale në vendimmarrje, të mbështetur nga kapacitetet e nevojshme.
Mbetet thelbësore që reforma të sjellë shërbime më të mira për qytetarët dhe të jetë në përputhje me standardet evropiane.
