Thomas Frank është shkarkuar nga posti i trajnerit të Tottenham, pas më pak se tetë muajsh në detyrë, pas humbjes zhgënjyese 2-1 në shtëpi ndaj Newcastle të martën.
Spurs renditen në vendin e 16-të në Premier League dhe janë vetëm pesë pikë larg zonës së rënies nga kategoria, pas një serie rezultatesh shumë të dobëta.
Skuadra nga Londra e Veriut nuk ka fituar në tetë ndeshjet e fundit në kampionat, seria më e gjatë pa fitore që nga tetori i vitit 2008.
Tottenham ka arritur vetëm dy fitore në 17 ndeshjet e fundit të ligës, duke grumbulluar vetëm 12 pikë gjatë kësaj periudhe.
Frank mori drejtimin e ekipit në qershor, pasi Ange Postecoglou u shkarkua, duke firmosur një kontratë deri në vitin 2028. Megjithatë, ai nuk arriti të përmirësojë ndjeshëm formën e skuadrës në kampionat, pavarësisht rezultateve të mira në garat evropiane.
Me një bilanc prej shtatë fitoresh, tetë barazimesh dhe 11 humbjesh në Premier League këtë sezon, danezi e drejtoi Tottenham drejt kualifikimit automatik në fazën e 1/16-ve të Ligës së Kampionëve, pasi përfundoi në vendin e katërt në fazën e grupeve.
Megjithatë, Spurs janë eliminuar nga të dyja kupat vendase, pasi u mposhtën nga Newcastle në raundin e katërt të Carabao Cup në tetor dhe nga Aston Villa në raundin e tretë të FA Cup muajin e kaluar. Në javët e fundit, tifozët e kanë vërshëllyer fuqishëm ekipin pas humbjeve në shtëpi ndaj Newcastle dhe West Ham, skuadra që gjithashtu luftojnë për mbijetesë.
Frank u tall gjithashtu nga tifozët e tij me thirrjet “do të shkarkohesh në mëngjes”, gjatë humbjes ndaj West Ham dhe barazimit 2-2 me Burnley që pasoi.
Pas vërshëllimave në fund të pjesës së parë, kur Tottenham ishte në disavantazh 2-0 ndaj Manchester City, skuadra e Frank reagoi duke barazuar 2-2 në stadiumin “Tottenham Hotspur”.
Kapiteni Cristian Romero kritikoi drejtuesit e klubit pas atij rezultati, duke e cilësuar si të turpshme faktin që skuadra kishte vetëm 11 lojtarë të gatshëm për ndeshjen ndaj City.
Argjentinasi më pas u ndëshkua me karton të kuq direkt, i dyti për të këtë sezon, në ndeshjen kundër Manchester United më 7 shkurt, takim që përfundoi me fitoren 2-0 të “Djajve të Kuq”.
Në fazën e grupeve të Ligës së Kampionëve, Spurs fituan pesë ndeshje, barazuan dy dhe humbën vetëm një, atë përballë kampionëve në fuqi, Paris Saint-Germain.
Megjithatë, forma e tyre në Premier League ka qenë kryesisht e dobët që nga nëntori, përfshirë humbjen e rëndë 4-1 ndaj rivalëve lokalë Arsenal dhe disfatën 3-0 ndaj Nottingham Forest, që lufton për mbijetesë.
Muajin e kaluar, Frank deklaroi se ndihej i mbështetur nga drejtuesit e klubit, por BBC Sport ka mësuar se ai ishte tashmë nën presion të madh të brendshëm dhe se të paktën një anëtar i bordit ekzekutiv kishte ngritur mundësinë e ndërprerjes së bashkëpunimit.
Tottenham grumbulloi vetëm 10 pikë në shtëpi në kampionat nën drejtimin e Frank, por pati një bilanc më të mirë në transfertë, duke marrë 19 pikë në 13 ndeshje jashtë fushe.
Para se t’i bashkohej Tottenham, Frank kaloi shtatë vite në krye të Brentford, duke e ngjitur klubin nga Championship në Premier League në vitin 2021.
Mandati i 52-vjeçarit te Spurs nisi me humbjen me penallti ndaj PSG në Superkupën e UEFA-s, ku Tottenham kishte siguruar pjesëmarrjen falë triumfit në Europa League sezonin e kaluar nën drejtimin e australianit Postecoglou.
Tottenham fitoi ndaj Burnley, Manchester City dhe West Ham në katër ndeshjet e para të kampionatit, si dhe mposhti Villarreal në Ligën e Kampionëve. Por skuadra nuk arriti ta vazhdojë atë nisje pozitive dhe stili i lojës së Frank nuk arriti të bindë tifozët.
Megjithatë, ai u përball me probleme të shumta dëmtimesh gjatë sezonit. Skuadra ka disa lojtarë të rëndësishëm jashtë për shkak të dëmtimeve afatgjata, përfshirë Lucas Bergvall, Ben Davies, Richarlison, Rodrigo Bentancur, Mohammed Kudus, Dejan Kulusevski dhe James Maddison.
Spurs do të jenë gjithashtu pa kapitenin e pezulluar Romero për tre ndeshjet e ardhshme në Premier League, përfshirë derbin e Londrës së Veriut ndaj Arsenal më 22 shkurt.
© Panorama.al
