Bllokimi i aksit Librazhd-Përrenjas pak ditë më parë ka shkaktuar kaos në juglindje për shkak të shembjeve dhe rrëshqitjeve. Shumë qytetarë u prekën nga vendimi për të bllokuar qarkullimin, ndërsa mbetën të bllokuar edhe në rrugët alternative për shkak të fluksit të lartë.
Megjithatë, ndonëse situata është prej ditësh emergjente, ndërhyrjet konkrete ende nuk kanë nisur. Kreu i Autoritetit Rrugor Shqiptar, Ami Kozeli, ai i Agjencisë Kombëtare të Mbrojtjes Civile, Haki Çako dhe përfaqësues të tjerë institucionalë dolën në një konferencë për mediat për të sqaruar situatën e krijuar në këtë aks rrugor.
Kreu i ARRSH-së deklaroi se vendimi për të mbyllë aksin erdhi pasi pati një spostim prej 30 centimetrash në krah të urës në vendin e quajtur “Arrat e Gurrës”. Shkaktimin e kësaj situate ai e “lidhi” me reshjet intensive të shiut, me erozionin lumor dhe saturimi i tokës.
Kozeli theksoi se në një mbledhje të sotme, kanë marrë vendimin për të ndërtuar një rrugë alternative përgjatë hekurudhës në shtratin e lumit Shkumbin, shembjen e urës së dëmtuar dhe ndërtimin e një të reje, si dhe devijimin e shtratit të lumit në pjesën që prek trupin e hekurudhës.
“Në mbledhjen e sotme, këshilli teknik i përbashkët mori këto vendime. Ndërtimi i një rruge alternative përgjatë hekurudhës në shtratin e lumit Shkumbin për të mundësuar kalimin e trafikut deri në stabilizimin e plotë të rrëshqitjes.
Rakordimi me hekurudhën shqiptare, Agjencinë Kombëtare të Mjedisit, Agjencinë e Menaxhimit të Burimeve ujore për realizimin e kësaj rruge, prishja e urës ekzistuese, dhe lehtësimi i ngarkesës në trupin e rrugës së rrëshqitur deri në krijimin e një skarpate natyrale. Devijimi i rrjedhës së Lumit që aktualisht godet trupin e hekurudhës për të garantuar mbrojtjen e saj dhe shmangur përkeqësimin e mëtejshëm të situatës.”, tha ai.
I pyetur për një afat kohor, brenda të cilit do të ndërtohet rruga e re, ai theksoi: “Ky aks i ri është 1.3 km nuk mund të them një afat konkret kohor.”
© Panorama.al
