Përfshirja e qeverisë në organizimin e një koncerti privat ishte jo vetëm e çuditshme por edhe një shkelje pasi u akorduan edhe 4,2 mln euro nga fondi i emergjencës, kurse arroganca e kryeministrit ndaj protestave popullore në Tiranë, tregon panikun që ai ka për humbjen e pushtetit.
Kështu u shpreh mes të tjerash në komentin e tij për aktualitetin politik dhe jo vetëm, këngëtari Robert Aliaj, në një lidhje direkte me News24 ditën e sotme.
Në lidhje me koncertin e këngëtarit Kanye West të shtunën, ai deklaroi se qeveritë nuk merren me koncerte private dhe se gjithçka u bë për propagandë nga Rama.
“Për çështjen e turizmit ndoshta edhe më kanë keqkuptuar, nuk e di pse s’kuptohen njerëzit. Ishte nismë private, sepse qeveritë nuk organizojnë koncerte. Një koncert që ishte në fund të fundit një iniciativë private, sepse qeveritë nuk bëjnë koncerte, i vetmi individ që ka takuar në jetën e vetë ‘Ye’ (Kanye West), njerëz me kreditë them në botë dhe Evropë, është Edi Rama, që ja hapi edhe zorrët dhe e trajtoi si Çu Yen Lain në kohën e Enver Hoxhës. As Ramiz Alia nuk bëri atë që bëri Edi, që u përdor për propagandë “Ye”, u përdor, por dështimi është aty, sepse nuk ka mundësi që një qeveri të aktivizojë buxhetin rezervë, janë aty, pa pasur nevojë, sepse janë 1 milion, ishte përsa i përket gënjeshtrave që u thanë”, tha këngëtari mes të tjerash.
Ai hodhi poshtë edhe deklaratat qeveritare se ky ishte një turizëm kulturor, duke shpjeguar se Shqipëria është shumë larg kësaj kategorie, sepse nuk ofron as kushtet minimale. Aliaj rrëfeu edhe eksperienca personale me të huaj që kishte sjellë herë pas here si turistë në Shqipëri.
“Sa i përket turizmit, mbi të gjitha ky nuk është turizëm dhe as turizëm kulturor. Turizmi kulturor zhvillohet me kushte dhe jo me një vend si Shqipëria, që njihet shumë keq për vlerën e vetë, nuk them për detin se det ka kudo. Edhe turistët që kanë ardhur, që i kam sjellë vetë, mes tyre edhe një prokuror belg, ata që kam sjellë, pas shumë kohësh më kanë thënë se Tirana ishte qytet pa identitet, madje edhe në jug kur shkuan ishte e tmerrshme, ikën në Korfuz, sepse u zhgënjyen. Se pse nuk ma thanë. Turistat kërkojnë të zbulojnë vendin, kështu është turizmi në të gjithë botën, zbulohet trashëgimia e vetë kulturore, kultura e vendit ku shkon. Kjo sjell jo vetëm të ardhura ekonomike. Turizmi promovon trashëgiminë kulturore. Pra ai vend duhet të ketë guidë, autobusë për të shkuar nga një vend në tjetrin, sepse nuk kanë të gjithë para. Flas për të huajt që vijnë me ‘bukë në sqetull’”, shpjegoi artisti.
Ai e cilësoi Tiranën si një “paçavure moderniteti” dhe që ka humbur identitetin e saj si pasojë e ndërtimit të kullave:
“Ndërtimi i kullave nuk është zhvillim ekonomik, është ndërtim i një privati. Por kur sheh Tiranën që shkatërrohet si ekzistencë qyteti, si paçavure moderniteti, është e dhimbshme kur e sheh, kategoria ime, të brezit tim, ne e humbën atashimin, kjo ka kosto gjigante, jo për kryeministrin”.
Dhe në fund, kritikoi kreun e qeverisë për arrogancën që shfaq ndaj protestës dhe protestuesve, qytetarëve dhe atyre që mendojnë ndryshe, duke lënë të kuptohet se ndjen panikun e humbjes së pushtetit.
Ai dënoi përdorimin e dhunës policore ndaj qytetarëve protestues, duke theksuar se “suksesi i pushteteve dhe politikës ka qenë shkatërrimi i gjithçkaje”.
“Dhe të gjitha veprimet e tij, që përdor arrogancë, përdor policinë ndaj protestuesve, tregon panikun që ai ka për të humbur pushtetin. Kjo politikë 30-vjeçare ka shkatërruar gjithçka. Këta kanë sukses në shkatërrimin total të gjithçkaje, është e vështirë jashtëzakonisht të kthehesh pas”, përfundoi Aliaj.
Më tej shtoi se:
“Protesta ka nevojë të mbështetet fuqimisht. Nuk ka më vend për indiferencë. Shqiptarët duhet të kuptojnë se ky është një moment historik për të ndërtuar një shoqëri më demokratike dhe më të barabartë”.
Sipas Aliajt, promovimi i një koncerti të tillë nuk përbën turizëm kulturor dhe nuk zgjidh problemet e imazhit të Shqipërisë.
“Më duket qesharake ajo shifra 100 mijë euro që thuhet se do të vinte nga koncerti apo që do t’i shërbente turizmit. Edhe Ramiz Alia nuk u soll aq, nuk e përdori faktin që solli Albanon në Shqipëri si propagandë, ndërsa ky si zorraxhi, sot përdoret si një sukses i madh. Ky nuk është turizëm kulturor. Shqipëria duhet të promovojë trashëgiminë e saj kulturore”, u shpreh ai.
Artisti kritikoi ashpër edhe Partinë Socialiste, duke deklaruar se ajo “është në gjendje kome”.
“PS është në gjendje kome, nuk e di nëse ekziston më si parti. Aty ka kokëboshë. Do të doja njerëz të ndërgjegjshëm. Parlamenti duhet të përfaqësojë qytetarët dhe jo tekat e kryeministrit”, tha Aliaj.
Këngëtari akuzoi kryeministrin Rama se, sipas tij, kërkon nënshtrim politik dhe se deputetët socialistë nuk ushtrojnë rolin që u takon në një sistem demokratik.
“Shqipëria vazhdon të perceptohet si një vend shumë i korruptuar. Këtë nuk mund ta mohojmë dhe as ta mbrojmë, sepse është shumë e dukshme”, deklaroi ai.
Sipas artistit, edhe pse turistët e vlerësojnë mikpritjen shqiptare, problemet me korrupsionin, administrimin dhe shërbimet ndikojnë drejtpërdrejt në cilësinë e turizmit dhe imazhin e vendit.
Pjesë nga fjala e këngëtarit Robert Aliaj:
“Duket se kryeministri duket se ka nevojë të jetë i nënshtruar, siç nënshtron shtresat e vogla. Siç duket edhe ajo turmë që ndjek kryeministrin, PS është në gjendje kome, pasi nuk e di nëse ekziston. Aty ka kokëboshë. Do të doja njerëz të ndërgjegjshëm. Një parlament është përfaqësuesi im dhe jo i kryeministrit. Nuk është aty për të plotësuar tekat dhe të realizojë çfarë do kryeministri. Ky propozon atë sistem skllavërues, që ata socialistë e meritojnë. Ata kanë nevojë më shumë të rrinë se të lëvizin.
Më duket qesharake ajo shifra 100 mijë euro që do të vinte nga koncerti apo që do të shërbente për turizmin. Ata që erdhën në konvert, gjoja ata 35 mijë persona. Këtë herë u përdor propagandë, IA. Edhe Ramiz Alia nuk e përdori faktin që solli Albanon në Shqipëri, nuk e tregoi këtë fakt, ndërsa ky si zorraxhi. Ky nuk është turizëm kulturor. Shqipëria njihet shumë keq dhe pak, se det ka kudo. E di se kam bërë nja 3 udhëtime me të huaj në Shqipëri, mes tyre dhe prokurorë belg. Në një event ku patëm ne, takova një nga këta prokurorë. Ata më thanë; Tirana është qytet pa idenitet. Sikur është ndërtuar brenda një dite. Kurse në jug, ishin tmerruar që natën e parë. Kishin ikur në Korfuz. U gënjyem thanë. Ky është një impakt i një kategorie që nuk plaset si bretkosë në diell.
Turizmi në gjithë vendin, duhet të prmovojë trashëgiminë kulturore. Nuk është se ka ndonjë opinion solid pa e vizituar Shqipërinë, por karikaturën e korrupsionit të gjitha këto i dinë teorikisht. Pra Shqipëria akoma vazhdon në opinionin publik tek njerëzit të jetë ai vendi shumë i korruptuar, domethënë gangsterësh e politikë. Domethënë kjo gjë nuk mohohet dot edhe ne vetë s’kemi si ta mbrojmë dot Shqipërinë nga kjo gjë sepse është shumë e dukshme.
Unë kam miq për shembull, një mik shumë të rëndësishëm në Komisionin Europian që më ka thënë disa herë që: “Robert, ne i japim shumë para Shqipërisë”. Domethënë ka qenë një bisedë e tensionuar, kam shumë miq familjarë, edhe ka qenë biseda e fundit që kemi bërë shumë e tensionuar nga ankesat që kisha unë në lidhje me Komisionin Europian, me Parlamentin Europian, edhe domethënë me karikaturën e këtyre komisionerëve që vijnë këtu edhe tregojnë gënjeshtra për arsye simpatie personale ose për arsye se ka një përfitim aty.
Se askush nuk e merr përsipër këtë gjë pa pasur një arsye se pse këta e bëjnë këtë gjë, sepse e dimë shumë bukur se ku është Shqipëria sot e kësaj dite, domethënë kur vjen puna në aplikimin e proceseve demokratike në të gjithë spektrin e aktiviteteve, që nga liria deri tek mjedisi e klima, është katastrofë.
Pra të gjitha këto mohohen këtu kur i dëgjon nëpër këto qarqe dhe nuk njihen sepse nuk janë, si të them, çështje topike që mund t’i flasësh me njerëz të thjeshtë. Këto janë çështje ndërqeveritare, sepse ata i kanë edhe të dhënat, statistikat e të gjitha, dhe ka shumë abuzim. Kështu që e vërteta është që njerëzit këtu e duan Shqipërinë, ka një pozitivitet për shqiptarët, po ndryshon shumë trendi, po thonë janë njerëz shumë mikpritës, por ama ka shumë ankesa për shumë gjëra të tjera.
Pra shërbimet që nuk vijnë dot, edhe të tjerat domethënë kur vjen puna te korrupsioni, tek problemet e tjera. Do thuash ti që turistët nuk përballen me korrupsionin; është e vërtetë, por korrupsioni ka një impakt tek mikpritësi, tek unë, tek mënyra se si unë sillem me atë tipin, në çfarë rrjete merimange më ka futur mua vetë edhe biznesin, se si kontrollohen bizneset, se si taksohen, e të gjitha këto kanë impaktin e tyre në shërbime.
Diaspora solli një shpresë aty sepse energjia, mënyra si erdhën mbi të gjitha, shpreh atë energjinë që ata transmetojnë nëpërmjet asaj dëshire. Se të shkosh nga diaspora e të vish në Shqipëri për këtë gjë, do kurajo, do edhe vullnet, dhe të kesh brenda atë dëshirën për vendin tënd. Të gjitha këto aty u deklaruan në një mënyrë shumë demonstrative dhe ishte shumë energjike, edhe kur e shihje në ekran. Kishte entuziazëm shumë të madh, por mbi të gjitha sepse janë të lidhura gjërat edhe me mbijetesën e shqiptarëve.
Diaspora ka një peshë në ekonominë e vendit atje sepse njerëzit, duam s’duam ne, ndihmojnë familjet e tyre. Pra kjo është një arsye e fortë që e bën diasporën të ketë autoritet tek të gjithë, sepse në fund të fundit, çdo familje që ka një djalë ose një prind që është jashtë dhe që mban familjen këtu në të gjitha format e marrëdhënieve, ndihma ekonomike në Shqipëri – në atë mjerim që janë familjet e thjeshta – është ajër, është uji që u mungon, është gjithçka. Ka shumë familje që mbahen nga kjo ndihmë.
Po aq më tepër pastaj entuziazmi që u dha edhe njerëzve që nuk kanë lidhje direkte me diasporën, por e shohin diasporën si një zgjidhje. Zgjidhje sepse diaspora vjen me njerëz me një vizion të ndryshëm nga shqiptarët që kanë kaluar vitet këtu. Vitet jashtë kanë funksionuar në formimin e mendimit të këtyre njerëzve për t’u bërë më tolerantë, më të vëmendshëm dhe jo indiferentë me hallet e të tjerëve. Sepse Evropa ka një dimension social të jashtëzakonshëm (në kuptimin pozitiv) që të bën pak a shumë njeri, të bën të mendosh pak edhe për hallin e tjetrit ose të mendosh për mjedisin – gjë që në Shqipëri nuk ke kohë ta bësh sepse është mbijetesa. Prandaj diaspora e meriton atë vend sepse janë bijtë e Shqipërisë, dhe fakti që erdhën treguam që kanë një kujdes, vëmendje dhe dashuri për atë vend.
Protesta ka nevojë që ajo lëvizje të mbështetet fuqimisht. Dhe është një gjë e tmerrshme që shqiptarët, edhe pse janë në mjerim e me vështirësi ekonomike, prapëseprapë zgjedhin të jenë asnjëanës ose thonë se kanë frikë sepse kanë njerëz të familjes që punojnë në administratë, ose tregojnë indiferencë. Nuk ka më vend për indiferencë! Shqiptarët duhet të kuptojnë se ky është një moment historik ku po ndodh një gjë e jashtëzakonshme. Po të them, e jashtëzakonshme. Unë nuk dua t’i futem shumë më thellë, por energjia që shoh në atë shesh, dëshira për të krijuar një shoqëri më të shëndetshme, më tolerante, më demokratike, më të barabartë (sepse s’ka barazi), të gjitha këto gjëra nuk mund të injorohen nga shqiptarët. Shqiptarët duhet të tregojnë që janë njerëz dhe nuk kanë mbetur mbeturina të një periudhe të vdekur që i shërbejnë një sistemi tani.
Nuk është larg, për arsye se ajo fabula e integrimit të Shqipërisë në Evropë është akoma si të thuash qesharake, në kuptimin e pretendimeve të kryeministrit. Sepse po gëzohet sot për shembull me gjërat që do të ndodhin sot, mirëpo harron në fakt çështje dhe kapituj ekstremisht të rëndësishëm siç janë prokurimet publike, politika e konkurrencës, drejtësia, liria, siguria, mjedisi dhe klima. Siç thashë, janë kapituj që duhet të plotësohen në vijim, dhe për të cilët është tepër e vështirë të flasë një kryeministër i zhytur në… më fal për shprehjen, edhe në krim, të flasë për luftën kundër korrupsionit dhe krimit të organizuar, që është kapitulli 24 për shembull”.
© Panorama.al
