Është arrestuar nga policia autori i dyshuar i plagosjes me armë zjarri i 45-vjeçarit Genc Hoxha, pranë një servisi në zonën e njohur si “Ura e Dervishbegut”, në Shkodër.
Sipas informacioneve paraprake, Izvin Gucia dyshohet se ka qëlluar me armë zjarri në këmbë shtetasin Genc Hoxha, 45 vjeç, gjatë një konflikti për motive të dobëta.
Në pranga u vu Izvin Gucia, 39 vjeç, pronar i servisit, i cili dyshohet se është konfliktuar me 45-vjeçarin para se të përdorte armën e zjarrit.
Gjatë veprimeve hetimore, shërbimet e Policisë gjetën dhe sekuestruan armën e zjarrit tip pistoletë, e cila rezulton se mbahej me leje.
Njoftimi i policisë
Plagosi me armë zjarri në këmbë një 45-vjeçar gjatë një konflikti për motive të dobëta. Falë reagimit në kohë të shërbimeve të Policisë, kapet dhe vihet në pranga brenda pak minutash autori.
Sekuestrohet arma e zjarrit, pistoletë.
Specialistët për Hetimin e Krimeve të Komisariatit të Policisë Shkodër, në bashkëpunim me specialistët e Krimeve të Rënda, të mbështetur nga Forca e Posaçme “Shqiponja”, menjëherë pas marrjes së njoftimit se në vendin e quajtur Ura e Dervishbeg, një shtetas kishte plagosur me armë zjarri një shtetas tjetër, kanë organizuar punën për identifikimin e autorit dhe zbardhjen e rrethanave të rastit.
Falë reagimit në kohë të shërbimeve të Policisë, u bë e mundur identifikimi, kapja dhe arrestimi i autorit të dyshuar, shtetasit I. G., 39 vjeç, pronari i një subjekti servis, i cili ishte konfliktuar për motive të dobëta me shtetasin G. H.
Shërbimet e Policisë kanë bërë të mundur gjetjen dhe sekuestrimin e armës së zjarrit, pistoletë të cilën e kishte me leje.
Vijon puna për dokumentimin e plotë ligjor të rastit.
Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
© Panorama.al
