India revokoi sot (3 dhjetor) urdhrin për prodhuesit e telefonave celularë, për të parainstaluar një aplikacion të sigurisë kibernetike të zhvilluar nga qeveria.
Ky akt vjen disa ditë pasi plani shkaktoi reagime të ashpra nga kundërshtarët e kryeministrit Narendra Modi dhe aktivistët e privatësisë, për shkak të shqetësimeve se aplikacioni mund të përdoret për mbikëqyrje.
“Reuters” ka zbuluar se qeveria indiane u ka urdhëruar fshehurazi kompanive, përfshirë Apple, Samsung dhe Xiaomi, që të instalojnë paraprakisht aplikacionin “Sansar Saathi” (“partner komunikimi” në gjuhën hindi) në telefonat e tyre të rinj celularë brenda 90 ditëve.
“Qeveria ka vendosur të mos e bëjë të detyrueshëm para-instalimin për prodhuesit e telefonave celularë”, tha Ministria Indiane e Komunikimeve në një deklaratë për shtyp.
Ky veprim vjen pas ditësh protestash nga partitë opozitare për këtë çështje, ndërsa editorialet e gazetave gjithashtu e kanë denoncuar masën. Qeveria është gjendur gjithashtu në konflikt me prodhuesit e telefonave celularë, me Apple dhe Samsung që planifikojnë të mos zbatojnë direktivën, thanë burimet.
Më herët sot, Randeep Singh Sarjewala, një udhëheqës i lartë i partisë opozitare të Kongresit, tha në një memorandum drejtuar Parlamentit se qeveria duhet të sqarojë se ka autoritetin ligjor për të “imponuar një aplikacion që nuk mund të hiqet” dhe i kërkoi Parlamentit të diskutojë rreziqet për privatësinë dhe sigurinë.
“Ekzistojnë frikëra serioze se një aplikacion kaq i detyrueshëm mund të ketë një derë të pasme, duke vënë kështu të dhënat dhe privatësinë e përdoruesit në rrezik absolut”, shtoi ai.
© Panorama.al
