Një dekadë pas ndarjes me Brad Pitt, Angelina Jolie: Shpirti im luftarak është rikthyer! Fëmijët? Po i përgatis për momentin kur s’do të jem më, sesa për t’u bërë gjyshe

Angelina Jolie ka bërë një rrëfim të sinqertë për marrëdhënien me fëmijët e saj dhe ndikimin që kanë pasur në jetën e saj pas ndarjes së bujshme nga Brad Pitt.

Në një intervistë për Variety, aktorja e njohur hollivudiane theksoi se ndihet sikur ka rifituar shpirtin e saj luftarak një dekadë pas ndarjes nga Pitt.

“Mendoj se shpirti im luftarak më në fund është rikthyer. E humba për pak. U dobësova pak dhe po rikthehet kryesisht falë fëmijëve të mi, të cilët tani janë më të rritur dhe po më inkurajojnë atë”, u shpreh ylli kinematografik.

Sipas saj, kanë qenë pikërisht fëmijët ata që e kanë shtyrë të rizbulojë pjesë të vetes që kishte lënë pas dore gjatë viteve të fundit.

“Fëmijët e mi janë pothuajse të gjithë 18 vjeç, kështu që tani duan të më shohin duke udhëtuar nëpër botë, duan që të dal dhe të bëj gjëra. Më njohin më shumë se kushdo tjetër dhe ende u pëlqej, gjë që thotë shumë. Mendoj se më inkurajojnë shumë që të kthehem te aspekte të vetes për të cilat ndoshta nuk isha ndjerë aq e lirë t’i bëja.”

Aktorja tha se mendon më shumë për përgatitjen e fëmijëve të saj për momentin kur ajo nuk do të jetë më, sesa për mundësinë që një ditë të bëhet gjyshe.

“Unë i rris fëmijët e mi pothuajse duke i përgatitur për mungesën time dhe jo aq shumë duke i përgatitur për t’u bërë gjyshe. Kjo është ajo që ndodh kur e konsideron vdekjen si një realitet.”, shtoi më tej aktorja.

Jolie foli edhe për karrierën e saj, duke zbuluar se para divorcit kishte vendosur të largohej gradualisht nga aktrimi për t’iu përkushtuar regjisurës dhe angazhimeve humanitare. Megjithatë, rrethanat e jetës e rikthyen sërish para kamerave.

“E kisha lënë aktrimin pak a shumë para divorcit tim. Isha e përqendruar te regjisoria dhe mendoja se do të bëja punën time ndërkombëtare. Por pastaj papritmas e vetmja mënyrë për të qenë më shumë në shtëpi dhe për periudha të shkurtra kohore larg ose për të fituar një shumë të mirë parash, ishte të kthehesha te aktrimi. Po merrja vetëm gjërat që ishin të shkurtra ose afër ose mund të merrja [fëmijët e mi].”, tha ajo.

© Panorama.al